 |
| သနပ်ခါးပင် |
လာလည်ကြတဲ့ ကျွန်တော့်အစ်မနှမတွေအတွက် အညာသနပ်ခါး လက်ဆောင်ပေးမယ်နော်။
သနပ်ခါးက ကျွန်တော်တို့ဆီမှာ တကုတက
စိုက်တာတော့ သိပ်မရှိဘူးဗျ။ ကိုယ့်ယာခင်းနားမှာ အလေ့ကျ ပေါက်တာလေးတွေကို ပြုပြင်ထားကြတယ်။
အသုံးပြုချင်တော့ ခုတ်ပြီး သုံးလို့အဆင်ပြေတယ်။အရမ်း ရှားရှားပါးပါး မဟုတ်ဘူးပေါ့။ တောထဲထွက်ရင်သနပ်ခါးအပင်လေးတွေ တွေ့နိုင်ပါတယ်။ နေရာတိုင်း တော့ မဟုတ်ဘူးနော်။
အညာဒေသမှာ သနပ်ခါးက အညာသူလုံမပျိုတို့ရဲ့ အလှပြင်ပစ္စည်း
တခုဖြစ်ပြီး အညာနေပူ ဒဏ်ကိုလည်း ကာကွယ်ပေးတယ်။
အညာသူတွေ တောထဲထွက်ရင် သနပ်ခါးဘဲကြား လိမ်းတယ် ဆိုတာ
မျက်နှာကို နေပူဒဏ်ကနေ ကာကွယ်နိုင်အောင်လို့ပါ။
သနပ်ခါးတုံးနဲ့ ကျောက်ပြင် ကတော့ အညာက အိမ်တိုင်းလိုလိုမှာ ရှိပါတယ်။ ကျွန်တော်တို့ကို အမေက ငယ်ငယ်ကတည်းက သနပ်ခါးကို လိမ်းလိမ်းပေးတယ်။
ငယ်ငယ်ကဆို ရေချိုးပြီးရင် သနပ်ခါးသွေးပြီးသားတွေ
ပါးစပ်ထဲခွံ့တာကို အတော်ကြောက်တာ။ စကားပြောတတ်တဲ့
အရွယ်အထိ ရေချိုးပြီးတိုင်း သနပ်ခါးခွံ့ကျွေးသေးတယ်။
ကျန်းမာရေး ကောင်းတယ်တဲ့လေ။ အရသာက
ခါးသက်သက်နဲ့ဆိုတော့ ကလေးတွေ ဘယ်ကြိုက်မလဲနော်။
မကြိုက်လည်း ကြောက်တော့ စားရတာပါပဲ။
ငယ်ငယ်က ကျောင်းသွားရင် ရွာကျောင်းက ဆရာမက မျက်နှာမှာ
သနပ်ခါးပါမလာရင် ရိုက်တယ်ဗျ။ ယောကျာ်းလေးတွေလည်း
လိမ်းရတာပဲ။ ငယ်သေးတဲ့ အရွယ်ဆိုတော့ ကျန်တာတွေ
ဘာမှမစဉ်းစားဘူး။ တခါတလေကျတော့ ဖြစ်သလိုပဲ မှန်မကြည့်ဘဲ
ဟိုပွတ်ဒီပွတ် ပွတ်သွားလိုက်တာပဲ။ သနပ်ခါးပါရင် ပြီးတာပဲလေ
မဟုတ်ဘူးလား။ ကျွန်တော်ကလည်း လက်ဆောင်ပေးမလို့ဆိုပြီး
ငယ်ငယ်ကအကြောင်းတွေ ပြန်ပြောနေမိပြန်တယ်။ ဆောတီး ဆောတီး။
 |
| သနပ်ခါးပွင့် |
သနပ်ခါးအမျိုးအစား ဘယ်လောက်ရှိလဲတော့
ကျွန်တော် သေချာမသိဘူးနော်။
ရှင်မတောင်သနပ်ခါး၊ ရွှေဘိုသနပ်ခါး၊
အညာသနပ်ခါး စတာတွေတော့
ကြားဖူးတယ်။ လိမ်းလို့ရတာတော့
အတူတူပဲ ဖြစ်မှာနော်။ ကျွန်တော့်
အစ်မနှမတွေကတော့ ကျွန်တော့်ထက် ပိုသိလောက်တယ်။
ကျွန်တော်တို့ ဆီမှာတော့ သနပ်ခါးပင်က အလေ့ကျ ပေါက်တာနဲ့ လူစိုက်တဲ့ အပင်ဆိုပြီးနှစ်မျိုးရှိတယ်။ အပင်ရဲ့အပွေးကို ကြည့်ပြီးတော့ ခွဲလို့ရပါတယ်။ လူစိုက်တဲ့ သနပ်ခါးက
အပွေးထူတယ်။နှစ်ထပ်ပွေးပေါ့။ သူက ရောင်းပန်းလှတယ်။
အလေ့ကျပေါက်တဲ့ သနပ်ခါးကတော့ အပွေးက တစ်ထပ်ထဲပဲ
ဒါပေမဲ့ မွှေးတာကတော့ အလေ့ကျပေါက်တာက ပိုပြီးမွှေးတယ်ဗျ။
အနံ့လေးက ပိုပြီးသင်းတယ်။ အလေ့ကျပေါက်တဲ့ သနပ်ခါးကို
သုံးဖူးသူက ရွာတွေကို ဆင်းပြီးဝယ်ကြတယ်။ ကျွန်တော်တို့ ဆီမှာ
စိုက်သနပ်ခါးကတော့ သိပ်မရှိဘူး။
ရွာဦးဘုန်းတော်ကြီး ကျောင်းမှာတော့ အပင်
တစ်ရာနီးပါးလောက်ရှိတယ်။ ကျန်တာကတော့
ကိုယ့်ယာတောမှာ ပြုပြင်ထားတဲ့ အလေ့ကျပေါက်တဲ့
သနပ်ခါးပင်လေးတွေပဲ ရှိတယ်။
 |
| သနပ်ခါးသီးအစိမ်း |
နောက်တခုက ယာတောမဟုတ်တဲ့နေရာ တောထဲ တွေပေါ့
အဲ့လိုနေရာမျိုးမှာ ကျတော့ အပင်လေး တွေကသိပ်မမြင့်ဘူး။ အမြင့်က
ဒူးလောက်သာသာ ပဲရှိတယ်။ ပင်စည်ကို လိမ်းလို့မရသေးပေမဲ့
အမြစ်တွေက အတော်လေး မွှေးတယ်ဗျ။ အဲ့ဒီအပင်တွေကတော့
ဆိတ်ကျောင်း၊ နွားကျောင်း သမားတွေရဲ့ လက်ချက် မိမိသွားတယ်။
သူတို့က အမြစ်ကိုတူးယူကြတာလေ။ အလေ့ကျ ပေါက်တဲ့
သနပ်ခါးပင်က တစ်ထပ်ပွေးဆိုပေမဲ့ တော်တော် လေးမာတယ်။
အသွေးခံတာပေါ့။ ကြာကြာသွေးလို့ ရတယ်ပြောတာနော်။
အပင်ရင့် နေရင် အပွေးတွေက ရဲပြီးပြောင်လာတာ။
စိုက်တဲ့အပင်ကကျတော့ အဲ့ဒီလောက်ရင့်ဖို့ဆိုရင်
အကြာကြီး စောင့်ရတယ်။ ဥာဏ်ကူတာလေးတွေလည်း
ကျွန်တော်သိသလောက် ပြောပြအုံးမယ်နော်။ တချို့က သနပ်ခါးပင်ကို
နဲနဲလေးရင့်ခါနီးရင် အုတ်နီခဲတွေကိုထုချေ အရည်ဖျော်ပြီး
သုတ်လိမ်းပေးတယ်။ နောက်ပြီး မြေကြီးအနီမှုန့်တွေကိုလည်း
အရည်ဖျော်ပြီး သုတ်လိမ်းတတ်ကြတယ်။ သဘာဝ အတိုင်းရင့်တာနဲ့
ဥာဏ်ကူထားတာနဲ့က ကြည့်တာနဲ့ သိနိုင်ပါတယ်။
 |
| သနပ်ခါးတုံးရင့်ရင့် |
နောက်ဆိုးတာ တစ်ခုက ဥာဏ်ကူတာ
မဟုတ်ဘဲ သနပ်ခါးတုံး
အတုတွေ ရောပြီးရောင်းတတ်ကြတာ။အဲ့ဒီအပင်က သစ်ပုလွေပင်
လို့ ခေါ်ပါတယ်။ ကျွန်တော်တို့ ဆီမှာအတော်ပေါတယ်။ မသိရင်တော့
သနပ်ခါးပင် အတိုင်းပဲ။ သူ့အပွေးက သနပ်ခါးပင်ထက်တောင်
လှသေးတယ်။ ဒါပေမဲ့ သနပ်ခါးနဲ့ ကွာတာက သစ်ပုလွေပင်ရဲ့
အပွေးကနဲနဲပွပြီးတော့ အဖြူဘက်ကို နဲနဲပါတယ်။ သနပ်ခါးရင့်တဲ့
အပင်ရဲ့ အပွေးက ဘာမှဆေးသုတ်စရာမလိုအောင်
မာပြီးတော့ရဲနေတာပဲ။ သနပ်ခါးရင့် မရင့်ခွဲတာက ကျွန်တော်တို့
ဆီကအလေ့ကျပေါက်တဲ့ သနပ်ခါးက ပိုပြီးလွယ်တယ်။ သနပ်ခါးပင်
ရင့်လာရင် အပွေးတွေက နီရဲပြီး ပြောင်ချောနေတာပဲ။ စိုက်တဲ့
အပင်မှာလည်း တကယ်ရင့်တဲ့ အပင်ဆိုရင် အပွေးတွေက
မာပြီးပြောင်နေတာပဲ။
 |
| သနပ်ခါးသီးအမှည့် |
သစ်ပုလွေ(သနပ်ခါးတုံးအတု)နဲ့သနပ်ခါးအစစ်ကို ရောနေရင်
ဘယ်လိုခွဲမလဲ။ သာမန်ကြည့်ရင်တော့ လွယ်လွယ်နဲ့ မသိနိုင်ဘူးဗျ။
အနံ့ကို နမ်းကြည့်ရင်လည်း သစ်ပုလွေတုံးကို
သနပ်ခါးအစစ် သွေးပြီးသား သုတ်လိမ်းတတ်လို့ အနံ့ကတော့
သနပ်ခါးနံ့ပဲရလိမ့်မယ်။ သွေးပြီးလိမ်းကြည့်ရင်တော့ သနပ်ခါး
အစစ်က အသားအရေကို အေးမြစေသော်လည်း သစ်ပုလွေက
အသားအရေကို ပူလောင်စေပါတယ်။ ကျွန်တော့်အစ်မ
တစ်ယောက်ပြောပြလို့ပါ။ ကိုယ်တိုင်တော့ လိမ်းမကြည့်ဖူးဘူး။
မတည့်တဲ့သူ သစ်ပုလွေတုံး လိမ်းမိရင် မျက်နှာကြီးက
ဖူးယောင်လာတယ်လို့ပြောတယ်။ ကျွန်တော်တို့အညာမှာတော့
သစ်ပုလွေပင်ကို ထင်းလောက်ပဲ သုံးပါတယ်။ဒါတောင် အမြဲတမ်း
မဟုတ်ဘူး။ တခြားသစ်ပင်တွေက ပေါတယ်လေ။ သစ်ပုလွေအပင်က
သနပ်ခါးပင်လိုပဲ ဆူးလည်းပါတယ်။ အရွက်ကတော့
အရမ်းကြီးမဆင်ဘူး။ အရွက်မပါပဲ ပင်စည်ဆိုရင်တော့ မသိသူဆို
သနပ်ခါးပင်နဲ့ အတူတူပဲ။ သနပ်ခါးတုံးဆိုတာကလည်း
ပင်စည်ပဲ ရောင်းတာလေ။ အရွက်ကိုပြမထားတော့
သစ်ပုလွေနဲ့ ရောထားရင် ဘယ်လိုလုပ်ပြီးသိနိုင်မှာလဲ။ အဲ့ဒီအချက်က
မသမာသူတွေအတွက် အခွင့်ကောင်းပဲဗျ။
ကျွန်တော်တို့အညာမှာတော့ သနပ်ခါးဝယ်သူလာရင် အပင်ကို
ကိုယ်တိုင်လိုက်ပြပြီး ၀ယ်သူကြိုက်မှ ခုတ်ပေးတယ်။
လက်ဆောင်လိုချင်ရင်တော့ ကျွန်တော်တို့ရွာကို လိုက်လည်မှ
ရမယ်ဗျ။ ကျွန်တော့်အဖိုးက တောထဲမှာ တဲနဲ့နေတာ။ အဖိုး
ယာတောမှာ
အလေ့ကျသနပ်ခါးပင်တွေ ပြုပြင်ထားတာ တော်တော်များတယ်။
အဖိုးက သဘောလည်း ကောင်းတယ်။ ဧည့်သည်ဆိုရင်
သနပ်ခါးတုံးလက်ဆောင် ပေးတတ်တယ်။ ကျောင်းတက်တုန်းက
သူငယ်ချင်းမတွေ အလည်လိုက်လာတာ အပြန်ကျတော့ သနပ်ခါးတုံး
လက်ဆောင်ပေးလိုက်လို့ ပျော်နေကြတာ။ နောက်ထပ်တောင်
လိုက်ပါအုံးမယ်လုပ် နေလို့ဗျာ။ ကျွန်တော်တို့ဆီမှာက သနပ်ခါးပင်
သိပ်ပြီးမရှားဘူး။
 |
| ကြိုက်တတ်ရင် လိမ်းသွားနော် အဆင်သင့်သွေးထားတယ် |
သနပ်ခါးပင်ရဲ့ အဓိကအသုံးဝင်တာကတော့ ပျိုမေတို့
မျက်နှာမှာလိမ်းခြယ်တာပေါ့။ နောက်ပြီး သနပ်ခါးအမြစ်က အနာတွေ မှာလိမ်းပေးရင် အညှော်ဝင်တာတွေ၊
အနာရင်းတာ တွေအတွက် ကောင်းပါတယ်။
သနပ်ခါးအရွက်ကိုတော့ နေမကောင်း ဖြစ်တဲ့သူတွေ
နလန်ထခါစ ရေစချိုးရင် သနပ်ခါးရွက်ပြုတ်ရည်လေးနဲ့
ချိုးပေးကြတယ်။အလေ့ကျပေါက်တဲ့ သနပ်ခါး ပင်က
အသီးသိပ်ပြီးများများ မသီးဘူး။စိုက်တဲ့ သနပ်ခါးကတော့
အသီးတွေခဲနေအောင် သီးတယ်။ သနပ်ခါးသီးကိုတော့ မျိုးစေ့
အတွက် သုံးကြပါတယ်။အဲ့ဒီသနပ်ခါးသီးကို ငှက်တွေ
စားရာက တောထဲမှာ သနပ်ခါးအလေ့ကျပင် ပေါက်တာပါ။
သနပ်းခါးကို နေစဉ်လိမ်းခြယ်ပေးခြင်းဖြင့် မျက်နှာအသာအရေကို
စိုပြည်ချောမွတ်စေပြီး မျက်နှာမှာအသား
ပတ်ခြင်းမှကာကွယ်ပေးပါတယ်။ နေပူပူ တောထဲသွားလို့်
မျက်နှာကိုသနပ်ခါးထူထူ လိမ်းသွားရင် နေပူဒဏ်မှ
ကာကွယ်ပေးပါတယ်။ နောက်ပြီး မျက်နှာက သနပ်ခါးနံ့လေးက လူကို
အမောပြေစေပါတယ်။ ကျွန်တော်တို့လည်း ရွာတုန်းကတော့ ညဆိုရင်
သနပ်ခါးတုံးတွေ သွေးပြီးလိမ်းတယ်ဗျ။ နွေရာသီမှာ အရမ်းပူရင်
မျက်နှာကို သနပ်ခါးလိမ်းပြီး နေရတာ အေးအေးလေးနဲ့
အတော်နေလို့ကောင်းတယ်။ သနပ်ခါးနဲ့ သင်းသင်းလေးကိုလည်း
သဘောကျတယ်။ ဆေးအဖြစ်သုံး တာပေါ့နော်။ဟဲ….ဟဲ
 |
| သနပ်ခါးရွက် |
ဟိုသီချင်းလေးကိုတောင် ပြောင်းပြီး ဆိုလိုက်
ချင်တယ်"ရွှေဘိုသနပ်ခါးတုံးများ ရန်ကုန်လိမ်းဖို့ယူ
ဘယ်လိုအသားမည်းမည်း ၀ါဝါညက်ညက်ဖြူ" ဆိုသလို
"ရွှေညာသနပ်ခါးတုံးများ မြန်မာပြည်အနှံ့ လိမ်းဖို့ယူ ဘယ်လို
အသားမည်းမည်း ၀ါဝါညက်ညက်ဖြူ ဆိုပြီးတော့လေ"
ပြောသာပြောရတယ် အခုခေတ်က အလှကုန်
ပစ္စည်းတွေကလည်း ပေါမှပေါဆိုတော့
သနပ်ခါးတုံးလိမ်းသူက ခေတ်နောက်ကျ
သလိုများ ဖြစ်နေမလားမသိဘူး။ ဒါပေမဲ့ ကျွန်တော်တို့ အညာဘက်မှာ
အညာသူတွေ သနပ်ခါးတုံးလိမ်းတဲ့ အလေ့အထကတော့
မပျောက်ပျက်သေးတာ သေချာတယ်ဗျ။ ယနေ့ထက်တိုင်
အညာသူတွေ တောထဲသွားရင် သနပ်ခါးဘဲကြားလိမ်းဆဲ၊
ညနေခင်း ရေခပ်ဆင်းရင် သနပ်ခါးပါးကွက်လေးကွက်ဆဲ၊
ခါးကိုင်းနေပြီဖြစ်တဲ့ အဖွားတွေလည် ဘုရားသွားကျောင်းတက်ရင်း
သနပ်ခါးလိမ်းကြဆဲ ရှိနေပါသေးတယ်။ မြို့ကြီးတွေမှာ
အလှခြယ်ပစ္စည်းတွေ
မရေတွက် နိုင်လောက်အောင် ပေါနေသော်လည်း ကျေးတောပျော်
အညာသူလုံမေတို့ကတော့ သဘာဝစစ်စစ် သနပ်ခါးတုံး
လိမ်းခြယ်ကြတဲ့ ဓလေ့ကို ဆက်လက်ထိန်းသိမ်းနေဆဲပါ။ သူတို့တွေ
အတွက် မိတ်ကပ်တို့ ပေါင်ဒါတို့ ဆိုတာ ပွဲလမ်းသဘင်လောက် မှာပဲ
လိမ်းခြယ်ကြတာလေ။ ဒါတောင် အောက်ခံအဖြစ်လောက်ပါပဲ
အပေါ်က သနပ်ခါးရေကျဲလေး ပါတတ်သေးတယ်။
ဒီလောက်ဆို ဗဟုသုတ အနည်းငယ်တော့ ရလောက်မယ်ထင်ပါတယ်။
သနပ်ခါးနဲ့ ပတ်သက်ပြီး ကျွန်တော်သိသမျှ ပြန်ပြီး မျှဝေးပေးတာပါဗျာ။
သိပြီးသားဆိုရင်လည်း နှစ်ထပ်ရှိတော့ မှတ်မိတာပေါ့လေ။
ကျွန်တော်ရေးတဲ့အထဲမှာ ကျန်ခဲ့တာလေးတွေ
ရှိရင်လည်း ပြန်ပြီးတော့ မျှဝေပေး ပါအုံး။ ဗဟုသုတ ရတာပေါ့။
ကျွန်တော့်ဆီကို လာလည်ရင်းနဲ့ ဗဟုသုတအနည်းငယ် ရတယ်ဆိုရင်
ကျွန်တော် ရေးရကျိုးနပ်ပါတယ်ဗျာ။
စာဖတ်သူတို့ရဲ့ ရင်ထဲမှလာသော စကားလေးများက
ကျွန်တော့်အတွက် အားအင်တွေပါပဲ။
အားလုံး ကျန်းမာပျော်ရွှင်ကြပါစေ….
No comments:
Post a Comment