ဝဲကြီးရွာက အမှုချိန်း ရုံးချိန်းပျက်ကွက်သူ ရွာသားတစ်ချို့ကို ဖမ်းဆီးဖို့ သွားရောက်ခဲ့တဲ့ ရဲတပ်ဖွဲ့ဝင်တွေကို ကျေးရွာသားတွေက ၀ိုင်းဝန်းရိုက်နှက်ပြီး ဖမ်းဆီးခဲ့တယ်လို့ သိရပါတယ်။
အဲဒီလို လုပ်ရပ်ဟာ တရားဥပဒေစိုးမိုးမှုကို ထိခိုက်ကြောင်း ၊ ဥပဒေအရ ဆက်လက် အရေးယူသွားမှာ ဖြစ်ကြောင်း နိုင်ငံတော်သမ္မတရုံး ပြောရေးဆိုခွင့်ရှိသူ ပြန်ကြားရေး ဒုတိယဝန်ကြီး ဦးရဲထွဋ်က ၂ဝ ရက် နေ့ညနေပိုင်းမှာ ပြောခဲ့ပါတယ်။
အစိုးရက ပုံနှိပ်တိုက်အတွက်သိမ်းဆည်းထားတဲ့လယ်ယာမြေမှာ စိုက်ထားတဲ့သစ်ပင်တွေကို ၀င်ရောက်ခုတ်ခဲ့တဲ့ ရွာသား ၆ ယောက်ကို တရားစွဲဆိုထားတာ ဖြစ်ပါတယ်။
အဲဒီရွာသားတွေထဲက တချို့ကို ရုံးချိန်းပျက်ကွက်တာကြောင့် ၀င်ရောက်ဖမ်းဆီးရာမှာ အခုလို ရွာသားတွေနဲ့ ပဋိပက္ခဖြစ်ခဲ့တယ်လို့ဆိုပါတယ်။
နေပြည်တော် ကောင်စီ နယ်မြေ၊ပုဗ္ဗသီရိမြို့နယ်ပြည်သူ့လွှတ်တော်ကိုယ်စားလှယ် ဦးဇေယျာသော်ကတော့ ရဲတပ်ဖွဲ့အနေနဲ့ ဥပဒေလုပ်ထုံးလုပ်နည်းနဲ့ မကိုက်ညီတဲ့လုပ်ရပ်တွေပြုမူခဲ့တယ်လို့ ပြောပါတယ်။
အဲဒီ ပဋိပက္ခကြောင့် ရဲတပ်ဖွဲ့ဝင် ၇ ဦးနဲ့ ရွာသား ၅ ဦးခန့် ဒဏ်ရာရရှိခဲ့တယ်လို့ ပုဗ္ဗသီရိမြို့နယ် ကျည်တောင်ကန်ရဲစခန်းမှူး ဦးစိန်သောင်းက ပြောပါတယ်။
အဲဒီကိစ္စအတွက်ဝဲကြီးရွာသား ၁၀ ဦးကို နေပြည်တော် ဇေယျာသီရိမြို့နယ် ရဲမှူးက တရားလိုပြုလုပ်ပြီး ပုဒ်မ ၃၃၃ တာဝန်ထမ်းဆောင်နေသူကို မတရားနာကျင်စေမှု အပါအဝင်ပုဒ်မ ၃ ခုနဲ့ တရားစွဲဆိုထားတယ်လို့ သိရပါတယ်။
No comments:
Post a Comment