စစ်ကိုင်းမြို့ ဆင်များရှင်ကျောက်မျက်ရတနာဈေးမှ ဆိုင်ခန်းရှင်များက မိမိတို့ကျောက်ဝိုင်း ပီပြင်စွာ ပေါ်ထွက်လာရေးအတွက် ငြိမ်းချမ်းစွာ စုဝေးခွင့်နှင့် ငြိမ်းချမ်းစွာ စီတန်းလှည့်လည်ခွင့် နည်းဥပဒေနှင့်အညီ ဆန္ဒထုတ်ဖော်သွားမည်ဖြစ်ကြောင်း သတင်းရရှိသည်။
ဆင်များရှင်ကျောက်ဝိုင်းရှိ ဆိုင်ခန်းရှင်ဦးရေ (၁၀၀)ခန့်က ကျောက်ဝိုင်းဖြစ် မြောက်ရေးအတွက် ဇူလိုင် ၂၃ ရက်(မနက်ဖြန်) နံနက် ၉ နာရီမှ မွန်းလွဲ ၁ နာရီထိ ယင်းကျောက်မျက်ဈေးရှေ့တွင် ဆန္ဒထုတ်ဖော်ကြမည်ဖြစ်သည်။ စစ်ကိုင်းမြို့နယ်ရဲတပ်ဖွဲ့မှူးရုံးမှလည်း ခွင့်ပြုလိုက်ပြီဖြစ်ကြောင်း ဦးတိုက်လျှောက်ထားသည့် ကျောက်မျက်ဆိုင်ခန်း ရှင်တစ်ဦးဖြစ်သူ ဒေါ်မြင့်မြင့်သီက ပြောသည်။
“ ၁၉ ရက်နေ့ (ဇူလိုင် ၁၉)က တရားဝင်စာနဲ့ ခွင့်ပြုပေးလိုက်ပါတယ်။ လျှောက်တာကတော့ ၂၁၊ ၂၂၊ ၂၃ သုံးရက်လျှောက်တာ တစ်ရက်ပဲခွင့်ပြုတယ်။ ၂၁၊ ၂၂ က စနေ၊ တနင်္ဂနွေ ဖြစ်နေလို့ မရဘူးတဲ့။ ကျန်တာကတော့ တင်ထားတဲ့အတိုင်း ခွင့်ပြုပါတယ်”ဟု ယင်းအမျိုးသမီးကပြောသည်။
ဆန္ဒထုတ်ဖေါ်ရသည့်အကြောင်းရင်းမှာ တိုင်းဒေသကြီးအာဏာပိုင်များက ယခင်ကတည်းက တည်ရှိနေသော ဘော်ဂါကျောက်ဝိုင်းကိုပိတ်ပြီး ဆင်များရှင်ကျောက်ဝိုင်းသို့ ပြောင်းရွှေ့ဖွင့်လှစ်ရန် နှုတ်ဖြင့် အမိန့်ပေးသည့်အတွက် မိမိတို့ ကျောက်မျက်ဆိ်ုင်ခန်းရှင် ၁၃၀ က တစ်ဦးလျှင် ကျပ် ၁၀ သိန်းနီးပါးထည့်ဝင်ပြီး ဆိုင်ခန်းများ တည်ဆောက်ခဲ့ရကြောင်း၊ ကျောက်ဝိုင်းကို ၂၀၁၂ ဖေဖော်ဝါရီ ၁၁ ရက်မှစတင်ကာ ဖွင့်လှစ်ခဲ့ပြီး ယင်းနေ့တွင် နိုင်ငံတော်သမ္မတ ဦးသိန်းစိန်ကိုယ်တိုင် တက်ရောက်ခဲ့ကြောင်း၊ သို့သော် သမ္မတလာသည့်ရက်ပိုင်းသာ အရောင်းအ၀ယ်ဖြစ်ခဲ့ပြီး ကျန်နေ့များတွင် ဘော်ဂါကျောက်ဝိုင်းတွင်သာ ပြန်လည်အရောင်းအ၀ယ် ပြုလုပ်နေကြသည်ဟုဆိုသည်။
တရုတ်ကုန်သည်များကလည်း စကားပြန်များ၏အလိုအရ ဘော်ဂါကျောက်ဝိုင်းတွင်သာ အရောင်းအ၀ယ် ပြုလုပ်နေကြ၍ မိမိတို့ဈေး တရားဝင်ဖြစ်ပေါ်လာရေးအတွက် ဆန္ဒထုတ်ဖော် ရခြင်းဖြစ်ကြောင်း ဆင်များရှင်ကျောက် မျက်ရတနာဈေးမှ ဆန္ဒထုတ်ဖော်မည့် ဆိုင်ခန်းရှင်များက ပြောသည်။
“ကျွန်မတို့က အရင်ကတည်းက ဘော်ဂါမှာ အရောင်းအ၀ယ် လုပ်လာတာပါ။ အာဏာပိုင်တွေက ဘော်ဂါဈေးကို ဖျက်ပြီး ဆင်များရှင်ဝိုင်းကို ပြောင်းရမယ်ဆိုလို့ ကျွန်မတို့စိုက်ထုတ်ပြီး ဈေးဖြစ်အောင် လုပ်ရတာပါ။ ခုကျတော့ အရင်ဈေးဟောင်းနေရာမှာပဲ ရောင်းဝယ်ခွင့်ပြုနေတော့ ကျွန်မတို့ အများကြီးနစ်နာပါတယ်။ ဒါကြောင့် ခုလို ဆန္ဒထုတ်ဖော်ရတာပါ။”ဟု ပြောသည်။ ဘော်ဂါကျောက်မျက်ဈေးသည် စစ်ကိုင်းမြို့ ဘော်ဂါရပ်ကွက်ရှိ လမ်းမ၀ဲယာပေါ်တွင် တည်ရှိသည်။
No comments:
Post a Comment