လျှိဝှက်ဥယျာဉ်

Search This Blog

Loading...

အဖွဲ့ဝင်မယ်..Followers

သတင်း


<<<< ကြိုဆိုပါတယ် ပျော်ရွှင်သောနေ့လေးဖြစ်ပါစေ >>>>

Wednesday, 21 August 2013

နေရစ်တော့ ဇုန်ကားခေတ်

 ကားတင်သွင်းခွင့်မူဝါဒများ ပြောင်းလဲပေးခဲ့ပြီးနောက် တစ်ချိန်က လူအများစိတ်ဝင်စားခံခဲ့ရသော စက်မှုဇုန်ထုတ်ကားများမှာ အမေ့လျော့ခံဘ၀သို့ ရုတ်ခြည်းရောက်ရှိသွားသည်။

ယခင်အစိုးရလက်ထက်က စက်မှုဇုန်ကားထုတ်လုပ်သူများကို ပုံစံမျိုးစုံဖြင့် ဖြေလျှော့ပေးပြီး ဇုန်ထုတ်ကားစီးရေတိုးလာရန် ကြိုးပမ်းခဲ့ကြသည်။ ဇုန်ကားထုတ်သော လုပ်ငန်းရှင်အများစုသည် ချမ်းသာကြွယ်ဝသည့် လုပ်ငန်းရှင်ကြီးများအဖြစ်သို့ ရောက်ရှိခဲ့ကြသည်။

“လူကြီးတွေက စီးပွားရေးလုပ်ငန်းရှင်တွေကို မွေးပေးသလိုပဲ လုပ်ငန်းငယ်တွေက လုပ်ငန်းရှင်ကြီးတွေ ဖြစ်လာတယ်”ဟု ယခင်မော်လမြိုင်စက်မှုဇုန်ရှိ MGM မော်တော်ယာဉ်ထုတ်လုပ်ရေး လုပ်ငန်းရှင်တစ်ဦးကဆိုသည်။

“အဲဒီအချိန်တွေတုန်းကတော့ ရွှေထီးဆောင်းခဲ့တဲ့အချိန်ပေါ့”ဟု မိတ္ထီလာစက်မှုဇုန်မှ မော်တော်ယာဉ်ထုတ်လုပ်သူ လုပ်ငန်းရှင်ကိုကျော်ကျော်စိုးလွင်ကပြောသည်။

လက်တွေ့တွင် ပြည်တွင်း၌ထုတ်လုပ်ရန် မဖြစ်နိုင်သော ဇိမ်ခံကားများကိုပင် ပြည်တွင်း၌ထုတ်လုပ်သည်ဟု လုပ်ငန်းရှင်များကဆိုသည်ကိုပင် အစိုးရကလည်းဂုဏ်ယူ၍ ခွင့်ပြုပြီး ဖြေလျှော့မှုများ ဆက်တိုက်ပေးခဲ့သည်။

စက်မှုဇုန်များတွင် ၂၀၀၀ ပြည့်နှစ် နောက်ပိုင်းမှစတင်၍ ကားထုတ်လုပ်ရေးလုပ်ငန်းများကို စတင်ခဲ့သည်။ မူလက စက်မှုလုပ်ငန်းများနှင့် ဆက်စပ်လုပ်ကိုင်ခဲ့သူများသာမက အခြားသောလုပ်ငန်းလုပ်ကိုင်သူများလည်း ကားထုတ်လုပ်ရေးကို ကူးပြောင်းလာခဲ့သည်။

စက်မှုဇုန်များတွင် မော်တော်ယာဉ်စတင်ထုတ်လုပ်စဉ်မှာ လုပ်ရကိုင်ရလွယ်ကူသည့် ဂျစ်ကားများသာ အများဆုံးထုတ်ခဲ့ကြသည်။ ဒဂုံဂျစ်၊ မိတ္ထီလာဂျစ်၊ မန္တလေးဂျစ်တို့အပြင် ရာဇာဂျစ်ဟု အမည်ပေးထားသည့် ဂျစ်ပုများက လူအများပါးစပ်ဖျားတွင် ရေပန်းစားခဲ့သည်။

မူလကဂျစ်ကားများက ရေပန်းစားခဲ့သော်လည်း နောက်ပိုင်းတွင် လုပ်ငန်းသုံးကားများဖြစ်သည့် လိုက်ထရပ်ယာဉ်များက ထိပ်တန်းကရပ်တည်လာခဲ့သည်။ လိုက်ထရပ်ယာဉ်တစ်စီးလျှင် ကျပ်သိန်း ၁၆၀ မှ ၁၈၀ ကြားအထိ ဈေးကောင်းခဲ့သည်။ နောက်ပိုင်း ပစ်ကတ်၊ ပါဂျဲရိုး၊ လန့်ခရုဇာကဲ့သို့ အဆင့်မြင့်ကားများကိုပင် ပြည်တွင်း၌ ထုတ်လုပ်သည်ဆိုကာ ရောင်းချခဲ့ကြသည်။

ကနဦးစက်မှုဇုန်လုပ်ငန်းရှင်များမှ မော်တော်ယာဉ်များကို ထုတ်လုပ်ရာတွင် ပြင်ပမှ အင်ဂျင်ဆက်စပ်ပစ္စည်း ခြောက်မျိုးကို တရားဝင်နိုင်ငံတော်မှ တင်သွင်းပေးခဲ့သည့် မော်တော်ယာဉ်ကိုယ်ထည်ကိုသာ ပြည်တွင်း၌ထုတ်လုပ်ပြီး တပ်ဆင်အသုံးပြုရန် ရည်ရွယ်ချက်ဖြင့် ခွင့်ပြုပေးခဲ့သည်။

ပြည်တွင်း၌ အင်ဂျင်ပိုင်းကို ထုတ်လုပ်ရန် အရင်းအနှီးအား အမေရိကန်ဒေါ်လာ ဘီလီယံနှင့်ချီ ကုန်ကျဖွယ်ရှိသောကြောင့် ပုဂ္ဂလိကလုပ်ငန်းရှင်များအနေဖြင့် ယင်းအချိန်က မရင်းနှီးနိုင်ခဲ့သဖြင့် ထုတ်လုပ်ခြင်းမပြုနိုင်ခဲ့ကြောင်း အားမာန်သစ်မော်တော်ယာဉ်ထုတ်လုပ်ရေးကုမ္ပဏီမှ ဦးဇော်ဝင်းကပြောသည်။

အင်ဂျင်များကို အရင်းအနှီးများသည့်အတွက် မထုတ်လုပ်နိုင်သကဲ့သို့ အခြားကားတစ်စီးတွင် အရေးပါသည့် ဆက်စပ်ပစ္စည်းများကိုလည်း ယနေ့တိုင် ပြည်တွင်း၌ အရည်အသွေးမီ ထုတ်လုပ်ခြင်းမပြုနိုင်သေးပေ။ ဇုန်ထုတ်ကားများကို ၀ယ်ယူသုံးစွဲနေသူအချို့မှာ ၎င်းတို့စီးသောကားမှာ ဇုန်တွင်ထုတ်လုပ်သော ကားမဟုတ်ဘဲ ပြည်ပမှ တရားမ၀င်တင်သွင်းလာသော ကားဖြစ်နေ၍ အစိုးရမှ တရားမ၀င်ဟုသတ်မှတ်ပြီး ဒဏ်ရိုက်ခြင်းများကိုလည်း ခံခဲ့ရသည်။

“လုပ်ငန်းသုံးအတွက်လည်း အဆင်ပြေတယ်။ ယုံကြည်မိလို့ ၀ယ်စီးတာ ပြီးတော့မှ ပိုက်ဘောမိသွားတယ်”ဟု ဘုရင့်နောင်ပွဲရုံမှ စူပါကာစတန်ကို ၀ယ်ယူအသုံးပြုခဲ့သူ ကုန်သည်တစ်ဦးကပြောသည်။

ထို့ပြင် စက်မှုဇုန်ထုတ်ကားများ လိုင်စင်သက်တမ်းတိုးပါက ၀ယ်ယူထားသည့်ကုမ္ပဏီကို ပြန်အပ်ရပြီး လိုင်စင်ဝင်ရန်အတွက် ကုမ္ပဏီကို ၁၀ သိန်းအထိ ပေးဆောင်ခဲ့ရပြီး လိုင်စင်သက်တမ်းတိုးပြီး ကားပြန်ရောက်ရှိပါက မိမိကားကို ဘော်ဒီရုံသို့ ပြန်လည်ပို့ဆောင်ရပြီး အနည်းဆုံးငါးသိန်းမှ ခြောက်သိန်းအထိ ထပ်မံကုန်ကျပြန်ကြောင်း မော်တော်ယာဉ်ရောင်းဝယ်သူများအသင်းမှ ဦးမင်းဦးကပြောသည်။

ထို့ကြောင့် တစ်ချိန်က စက်မှုဇုန်ထုတ်ကားများကို ၀ယ်ယူစီးနင်းသူအများစုမှာ အစိုးရ၏ လွဲမှားနေသည့် မူဝါဒများအကြား အမြတ်ထုတ်လိုသည့် လုပ်ငန်းရှင်များကြောင့် များစွာနစ်နာခဲ့ရသည်။ မိမိနိုင်ငံတွင် မထုတ်လုပ်နိုင်သည်ကို အစိုးရမှ ထုတ်ဖော်ပြောဆိုခြင်းမပြုခဲ့ဘဲ စက်မှုဇုန်များတွင် မော်တော်ယာဉ်များ ထုတ်လုပ်နိုင်ပြီဖြစ်သည်ဟု နိုင်ငံပိုင်မီဒီယာများတွင် အကျယ်တ၀င့်ဖော်ပြခဲ့ကြသည်။ ၎င်းစက်မှုဇုန်ထုတ်ကားများကို စက်မှု(၂)၀န်ကြီးဌာနကပင် ပြည်ပမှတင်သွင်းလာသည့် ကားများကို မိမိနိုင်ငံတွင် ထုတ်လုပ်တပ်ဆင်သည်ဟုဆိုကာ ရောင်းချမှုများပင်ရှိခဲ့ကြောင်း အထက်ပါလုပ်ငန်းရှင်ကပြောသည်။

ယင်းအချိန်က မော်တော်ယာဉ်ထုတ်လုပ်ရန် နည်းပညာမရှိခြင်း၊ လိုအပ်သည့်ပစ္စည်းများ ပြည်တွင်း၌ မထုတ်လုပ်နိုင်ခဲ့ခြင်း စသည်တို့ကြောင့် ပြည်တွင်းထုတ်လုပ်ရေးလုပ်ငန်းများ၌ မသမာမှုများ ဖြစ်ပေါ်ခဲ့ရသည်ဟု လုပ်ငန်းရှင်များကပြောကြားသည်။ ကားထုတ်လုပ်ရေးလုပ်ငန်းတစ်ခုကို အကောင်အထည်ဖော်မည်ဆိုပါက အခြေခံအားဖြင့် မော်တော်ယာဉ်တစ်စီးတွင် ပါဝင်သည့် အစိတ်အပိုင်းများကို ထုတ်လုပ်သည့် အသေးစားအလတ်စားလုပ်ငန်းများကို ဦးစွာရှင်သန်ရန် မြေတောင်မြှောက်ပေးရန် လိုအပ်ကြောင်း ပြည်ပကားကုမ္ပဏီကြီးတစ်ခု၏ ဒါရိုက်တာတစ်ဦးက အကြံပြုပြောကြားခဲ့သည်။

လက်ရှိတွင် မော်တော်ယာဉ် အကြီးစားထုတ်လုပ်မှုလုပ်ငန်းများကို အစိုးရ၀န်ကြီးဌာနတစ်ခုဖြစ်သော စက်မှုဝန်ကြီးဌာနက မကွေးတိုင်းတွင် နှစ်စဉ် ကုန်တင်ယာဉ်အစီးတစ်ထောင်နှင့် ထရပ်ကားဂီယာ အလုံးငါးရာကို ထုတ်ပေးလျက်ရှိသည်။ သို့သော် ယင်းမော်တော်ယာဉ်များမှာ ပုဂ္ဂလိကဈေးကွက်တွင် ပြည်ပမှတင်သွင်းလာသည့် မော်တော်ယာဉ်များနှင့် ယှဉ်ပြိုင်ရောင်းချနိုင်ခြင်းမရှိခြင်း၊ နည်းပညာပိုင်းလိုအပ်ချက်ကြောင့် အရည်အသွေးမမီခြင်း စသည့်အားနည်းချက်များစွာရှိနေကြောင်း မော်တော်ယာဉ်ထုတ်လုပ်သူများကဆိုသည်။

ယခင်က စက်မှုဇုန်ကားများကို ထုတ်လုပ်ရာတွင် စက်ရုံကြီးများဖြင့် တခမ်းတနား ထုတ်လုပ်မှုများရှိသလို သစ်တစ်ပင်အောက် တဲလေးတစ်လုံးဖြင့် ထုတ်လုပ်နေသည့် လုပ်ငန်းများလည်းရှိသည်။ ယင်းသို့ထုတ်လုပ်ပြီးသား ကားများကို ကုန်းလမ်းပို့ဆောင်ရေးညွှန်ကြားမှုဦးစီးဌာနသို့ တရားဝင်လိုင်စင်ဝင်ပြီး နယ်စပ်တရားမ၀င် နိုင်ငံခြားမှတင်သွင်းလာသည့် တစ်ပတ်ရစ်ကားများဖြင့် ပြောင်းလဲခဲ့သည်။ ယင်းသို့ပြောင်းလဲရာတွင် စက်မှုဇုန်ထုတ်ကားမှ အင်ဂျင်နံပတ်၊ ချယ်စီနံပါတ်များကို တရားမ၀င်ကားများသို့ ပြောင်းလဲပြီး ပြည်တွင်း၌ ပြန်လည်ရောင်းချမှုများ ပြုလုပ်ခဲ့သည်။

“အင်ဂျင်ပါဝါခပ်ကြီးကြီး ကောင်တွေထဲက အင်ဂျင်ကိုယူပြီး ပုံစံတွေပြောင်းကြတယ်။ တချို့ပုံစံပြောင်းတာတွေလွဲကုန်တော့ ဆီစားက သာမန်ထက် နှစ်ဆဖြစ်ကုန်တယ်။ ၀ယ်စီးတဲ့သူတွေ အများကြီးနစ်နာခဲ့ရတာပေါ့”ဟု သင်္ဃန်းကျွန်းမြို့နယ်မှ KST ကားအရောင်းပြခန်းပိုင်ရှင် ဦးစိုးထိန်ကပြောသည်။

ယင်းကဲ့သို့ မသမာမှုများ လှည့်စားမှုမျိုးစုံဖြင့် စက်မှုဇုန်ကားထုတ်လုပ်ရေးလုပ်ငန်းအများစုမှာ ၂၀၁၁ ခုနှစ် စက်တင်ဘာ ၁၉ ရက်၌ အစိုးရသစ် ယာဉ်အိုယာဉ်ဟောင်း လဲလှယ်သည့် မူဝါဒကို စတင်လိုက်ချိန်တွင် တဖြည်းဖြည်းနိဂုံးပိုင်းကို ရောက်ရှိလာခဲ့ရသည်။ ယနေ့တွင် စက်မှုဇုန်ထုတ်လုပ်ငန်းများမှာ မြန်မာနိုင်ငံတွင် လုံးဝမရှိတော့ဘဲ ယင်းလုပ်ငန်းရှင်အများစုမှာ အသွင်ပြောင်းပြီး ပြည်ပမှ ကားတင်သွင်းသူ လုပ်ငန်းရှင်များအဖြစ် ပြောင်းလဲလုပ်ကိုင်လာကြသည်။

“ကားထုတ်လုပ်ရေးကတော့ နိုင်ငံခြားကုမ္ပဏီတွေနဲ့ ဖက်စပ်လုပ်နိုင်မှပဲ အဆင်ပြေတော့မယ်။ ထုတ်လုပ်ထားတဲ့ကားတွေကိုလည်း သူတို့ Brand နဲ့ဖောက်မှ
ကိုယ်ကလုပ်နိုင်မှာ”ဟု နိုင်ငံခြားကုမ္ပဏီနှင့် လက်တွဲလုပ်ကိုင်တော့မည့် ကားလုပ်ငန်းရှင်တစ်ဦးကပြောသည်။

ယနေ့ကားထုတ်လုပ်ရေးလုပ်ငန်းတွင် ကြိုးစားမှုအရှိန်ကောင်းနေသည့် တရုတ်နိုင်ငံသည်ပင် ၎င်းနိုင်ငံ သီးသန့်အမှတ်တံဆိပ်ဖြင့် မော်တော်ယာဉ်များ ထုတ်လုပ်နိုင်ခြင်းမရှိပေ။ ကမ္ဘာပေါ်ရှိ ကားထုတ်လုပ်ရေးလုပ်ငန်းများတွင် ထိပ်တန်းနေရာမှာရှိသော ဂျာမဏီနိုင်ငံမှ ဘောက်စ်ဝက်ဂွန်၊ ဆွီဒင်နိုင်ငံမှ Scenia စသည့်ကုမ္ပဏီတို့နှင့် ပူးပေါင်းပြီး ၎င်းတို့၏အမှတ်တံဆိပ်ဖြင့်သာ မော်တော်ယာဉ်များကို ထုတ်လုပ်ရောင်းချနေရသည်။

အစိုးရသစ်လက်ထက် မြန်မာနိုင်ငံတွင် ရင်းနှီးမြှုပ်နှံရောင်းချရန် ပြင်ဆင်နေသည့် ကမ္ဘာ့နာမည်ရ ကားကုမ္ပဏီကြီးများမှလည်း မကြာမီဖြန့်ဖြူးရောင်းချခြင်းအပြင် ပြည်တွင်းလုပ်ငန်းရှင်နှင့် ပူးပေါင်း၍ ယာဉ်အပိုပစ္စည်းများ ထုတ်လုပ်ခြင်း မော်တော်ကားစက်ရုံများ တည်ထောင်ရန် အကြိုကမ်းလှမ်းမှုများလည်း ရှိနေပြီဖြစ်သည်။

ထို့ကြောင့် ယခင်အစိုးရလက်ထက်က ချမှတ်ခဲ့သည့် စီမံခန့်ခွဲမှုအလွဲများ၊ မူဝါဒအမှားများကို ရှောင်ရှားပြီး နည်းပညာ အရင်းအနှီး အတွေ့အကြုံများရှိနှင့်နေပြီးသားဖြစ်သော ပြည်ပကုမ္ပဏီများနှင့် ပူးပေါင်းထုတ်လုပ်မှသာ ဇုန်ကားခေတ်ကဲ့သို့ အလိမ်အညာများနှင့်မဟုတ်ဘဲ ကားထုတ်လုပ်ရေးလုပ်ငန်းများ လမ်းကြောင်းမှန်ပေါ် ရောက်မည်ဖြစ်သည်။

“အဲဒီအချိန်တုန်းက လုပ်ငန်းရှင်တွေကို အစိုးရက တရားဝင်လိမ်ခွင့်ပေးခဲ့တာနဲ့ အတူတူပဲ။ အခုချိန်မှာ ကမ္ဘာပေါ်က ကားကုမ္ပဏီတွေ သူတို့အမှတ်တံဆိပ်ကို ပြောင်းလဲပြီး တပ်ဆင်လို့ဆိုပြီး မူပိုင်ခွင့်နဲ့ တရားစွဲမယ်ဆိုရင် ရှင်းလို့တောင်မရနိုင်ဘူး”ဟု မော်တော်ယာဉ်ရောင်းဝယ်သူများအသင်းမှ ဦးကျော်စွာစိုးကပြောသည်။

ရေးသားသူ- ပြည်သိမ်း၊ မိုးညို၊ အေးမြတ်သူ

No comments:

နောက်ဆုံးတင်ပြီသမျှ..ဆက်ဖတ်ရန်...အောက်သို့