လျှိဝှက်ဥယျာဉ်

Search This Blog

Loading...

အဖွဲ့ဝင်မယ်..Followers

သတင်း


<<<< ကြိုဆိုပါတယ် ပျော်ရွှင်သောနေ့လေးဖြစ်ပါစေ >>>>

Sunday, 25 August 2013

သူငယ်တန်းကျောင်းသူ အဓမ္မပြုကျင့်ခံရမှု ကျောင်းသားများနှင့် မသက်ဆိုင်ဟုဆို



ရန်ကုန်တိုင်းဒေသကြီး ကျောက်တန်းမြို့နယ်တွင် သူငယ်တန်း ကျောင်းသူတစ်ဦး အဓမ္မပြုကျင့်ခံမှုနှင့် ပတ်သက်၍ အခြေခံပညာ မူလတန်းကျောင်းရှိ အတန်းဖော် ကျောင်းသားများနှင့် ပတ်သက်မှုမရှိကြောင်း မှုခင်းတပ်ဖွဲ့ (CID) မှ ပြောကြားကြောင်း အဆိုပါ မူလတန်းကျောင်းမှ ကျောင်းအုပ်ဆရာကြီးက The Voice သို့ ပြောကြားသည်။

“ကျောင်းကို အဲဒီနေ့ (သြဂုတ် ၇ ရက်နေ့) ညနေ ၃ နာရီခွဲ ကျောင်းလွှတ်ချိန်လောက်မှာ CID က ဆိုပြီး လူသုံးဦး လာတယ်။ မြေပြင်အနေအထားကို စစ်ဆေးတယ်။ ၈ ရက်နေ့ နံနက်မှာ တစ်ခေါက်လာပြီး သူတို့ စစ်ဆေးသုံးသပ်ချက်အရ ကျောင်းနဲ့ ပတ်သက်မှု မရှိပါဘူး။ ကလေးမိဘတွေကိုလည်း အကြောင်းကြားပေးပါလို့ ပြောသွား တယ်” ဟု ၎င်းက ဆိုသည်။

မုဒိမ်းမှု ကျူးလွန်ခံရသော ကျောင်းသူက အတန်းဖော်တစ်ဦးက ကျောင်း အိမ်သာတွင် ကျူးလွန်ပါသည်ဟု အဓမ္မပြုခံရသည့် ဒုတိယအကြိမ် ထွက်ချက်တွင် ပြောကြားချက်သည် ပထမအကြိမ် ထွက်ဆိုစဉ်က အချက်များနှင့် ကွဲလွဲနေသောကြောင့် သူငယ်တန်းအရွယ် ကျောင်းသားများ အစစ်ခံရမည်ကို ကျောင်းသားမိဘများက စိုးရိမ်ခဲ့ကြောင်း ကျောင်းသားမိဘများက ပြောကြားသည်။

“ကျွန်တော့်ဆီကိုတော့ CID တပ်ဖွဲ့ဝင်တွေ တစ်ရက်ခြား၊ နှစ်ရက်ခြားလောက် ရောက်လာကြတယ်၊ စစ်ဆေးနေဆဲပဲလို့ သိရတယ်။ သူတို့ရဲ့ လုပ်ငန်းစဉ်တွေကို ကျွန်တော်မသိဘူး” ဟု ရွှေပျောက် ကျေးရွာအုပ်စု အုပ်ချုပ်ရေးမှူးက ပြောကြားသည်။

စာသင်ကျောင်းဝင်းအတွင်း အဓမ္မပြုကျင့်ခံရမှု ဖြစ်နိုင်ခြေ မရှိကြောင်းကို CID ၏ စစ်ဆေးချက်အရ သိရှိရသဖြင့် ကျောင်းသားမိဘများမှာ စိတ်ချမ်းသာကြောင်း အဆိုပါကျောင်းသူ အဓမ္မပြုကျင့် ခံရသည်နှင့် ပတ်သက်၍ သံသယဖြစ်သည်ဟု စွပ်စွဲခံရသူ အတန်းဖော်ကျောင်းသားများ၏ မိဘတစ်ဦးက The Voice သို့ ပြောကြားသည်။

အခြေခံပညာ မူလတန်းကျောင်းသည် အလျား ပေ ၁၀၀၊ အနံ ပေ ၁၀၀ ဝန်းကျင်သာရှိပြီး ကျောင်းနှင့် အိမ်သာမှာ ပေ ၂၀ ခန့်သာ ဝေးသဖြင့် ကျောင်းဧရိယာ ကျဉ်းကျဉ်းတွင် အဓမ္မမှု မဖြစ်နိုင်ကြောင်းကို ကျောင်းအုပ်ကြီးက ပြောကြားသည်။

အဓမ္မပြုခံရသည့် ကလေးငယ်သည် အမျိုးသမီးရေးရာ အဖွဲ့ဝင်များ၊ မှုခင်းဆိုင်ရာ အထူးကု ဆရာဝန်ကြီးများ၊ မွေးစားမိခင်နှင့် ကျေးဇူးရှင် ဘုန်းတော်ကြီးတို့၏ ရှေ့မှောက်တွင် ကနဦး ထွက်ဆိုခဲ့စဉ်က ၎င်းနေထိုင်ရာ တည်းခိုရိပ်သာအတွင်းရှိ ကောက်ရိုးပုံတွင် လူကြီးတစ်ဦးက ပြုကျင့်ပါ သည်ဟု ထွက်ဆိုခဲ့ပြီး သင်္ဃန်းကျွန်းမြို့နယ် မှုခင်းကျွမ်းကျင် ဆရာဝန်ကြီးများနှင့် ဗဟိုအမျိုးသမီးဆေးရုံမှ သားဖွားမီးယပ် ဆရာဝန်များ၏ ဆေးစစ်ချက်အရ အဓမ္မပြုကျင့်ခံရသည်မှာ သေချာကြောင်း သို့သော် ကလေးချင်း ကျူးလွန်ခြင်း မဖြစ်နိုင်ကြောင်းကို ဆေးပညာအရ သိနိုင် ကြောင်း ကျောက်တန်းမြို့နယ်ဆေးရုံမှ လက်ထောက်ဆရာဝန်တစ်ဦးက The Voice သို့ ပြောဆိုထားသည်။

No comments:

နောက်ဆုံးတင်ပြီသမျှ..ဆက်ဖတ်ရန်...အောက်သို့