ရန်ကုန်တိုင်းဒေသကြီး တောင်ဥက္ကလာပမြို့နယ် (၁၀) ရပ်ကွက် အဿကလမ်းနှင့် ၂၅ လမ်းထိပ်တွင် သြဂုတ်လ ၂၆ ရက် မွန်းလွဲ ၂ နာရီ ၁၅ မိနစ်က အနှေးယာဉ် (ဆိုက်ကား) ပေါ် လိုက်ပါလာသော အသက် ၄၄ နှစ်အရွယ် အမျိုးသမီး တစ်ဦး၏ မျက်နှာကို အမျိုးသား တစ်ဦးက ဓားဖြင့် ရုတ်တရက် လှီးကာ အကြမ်းဖက်ခံရသဖြင့် မလိုလားအပ်သော ပြဿနာများ မဖြစ်ပွားစေရန် လုံခြုံရေးအရေးပေါ် တိုးမြှင့်ထားကြောင်း မျက်မြင် တွေ့ရှိသူများထံမှ သိရှိရသည်။ယင်းနေ့ ညနေပိုင်း မြို့နယ် ရဲစခန်းရှေ့တွင် တောင်ဥက္ကလာပမြို့နယ်တွင်း လုံခြုံရေးအဖြစ် ရဲလုံခြုံရေး ရှေ့ပြေးယာဉ် ရှစ်စီးခန့်နှင့် လုံခြုံရေးယာဉ် နှစ်စီး တို့ဖြင့် တိုးမြှင့်ထားကြောင်း မျက်မြင်တွေ့ရှိသူ တစ်ဦးက ပြောကြားသည်။
ဒေါ်ချိုချိုဝင်းသည် (၁၃) ရပ်ကွက် အနော်မာလမ်းရှိ အမှတ် (၃) အခြေခံပညာ အထက်တန်းကျောင်း တွင် စာသင်ကြားနေသည့် သားကို ကျောင်းသွားကြိုရာ လမ်းခုလတ်တွင် မျက်နှာကို ဓားဖြင့် အလှီးခံရ သာကြောင့် ၎င်း၏ ညာဘက် ပါးတွင် ဒဏ်ရာ ရရှိကာ ၁၆ ချက် ချုပ်ရကာ သင်္ဃန်းကျွန်း မြို့နယ် ဆေးရုံတွင် ဆေးကုသမှု ခံယူလျက် ရှိကြောင်း ၎င်းက ပြောဆိုသည်။
“ဆိုက်ကားရှေ့ကနေ တစ်ယောက်က ပိတ်ရပ်တယ်။ နောက်တစ်ယောက် က ဘေးမှာ တွေ့လို့ လှည့်ကြည့်လိုက်တော့ လက်မနဲ့ လက်ညှိုးကြား ညှပ်ထားတဲ့ ဘလိတ်ဓားလို ဟာမျိုးနဲ့ မျက်နှာကို ဆွဲခြစ်မိပြီး ပူခနဲ ဖြစ်သွား တယ်။ မျက်နှာသာ မလှည့်မိရင် လည်ပင်းများ လှီးမလား မသိဘူး” ဟု ၎င်းက ရှင်းပြသည်။
အဆိုပါ ဓားဖြင့်လှီးသူ အမျိုးသား နှစ်ဦးသည် ဓားဖြင့် လှီးပြီးနောက် ထွက်ပြေးခဲ့ရာ အနှေးယာဉ် မောင်းသူသည် အသက်အရွယ် ကြီးရင့်သဖြင့် စတင် ဖြစ်ပွားချိန်၌ ရုတ်တရက် မှင်တက်နေခဲ့ကြောင်း၊ ပုံမှန် လူပြတ်ခြင်း မရှိသော အဆိုပါလမ်းတွင် ဖြစ်ပွားချိန်၌ လူပြတ်နေခြင်းကြောင့် ဖမ်းဆီးနိုင်ခြင်း မရှိကြောင်း အဿက ၂၅ လမ်းတွင် နေထိုင်သူ ဦးသိန်းလွင် က ပြောကြားသည်။
“ထွက်ပေါက် လမ်းတွေကိုလည်း သိနေတယ်။ ဆေးကြောင်နေတဲ့သူဆိုရင် တစ်ယောက်ကိုလုပ်ပြီးရင် နောက်တစ်ယောက်ကို ထပ်လုပ်ဖို့ ဝန်မလေးဘူး။ ဘာတစ်ခွန်းမှ မပြောဘဲ ဒီလို လုပ်သွားတာ စဉ်းစားစရာပဲ” ဟု ဒေါ်ချိုချိုဝင်းနှင့် မောင်နှမ တော်စပ်သူ ဦးဇော်ဝင်းက သုံးသပ်သည်။
ယင်းနေ့ ညနေ ၅ နာရီက (၁၀) ရပ်ကွက် အုပ်ချုပ်ရေးမှူး ရုံးထံသို့ သွားရောက် မေးမြန်းခဲ့သော်လည်း ရပ်ကွက်တွင်း ဖြစ်ပွားမှုနှင့် ပတ်သက်၍ ဖြေကြားနိုင်ခြင်း မရှိကြောင်းနှင့် မြို့နယ် ရဲစခန်းကို သာ မေးမြန်းပါရန် အုပ်ချုပ်ရေးမှူးက ပြောကြားသည်။
အမျိုးသမီးမျက်နှာ ဓားလှီးခံရမှုနှင့် ပတ်သက်၍ (ပ) ၃၁၂/၁၃၊ ပြစ်မှု ပုဒ်မ ၃၂၆၊ ၃၄၁၊ ၁၁၄ ဖြင့် အမှုဖွင့် စစ်ဆေးလျက်ရှိပြီး ပြစ်မှု ကျူးလွန်သူများကို စုံစမ်းလျက်ရှိကာ ၎င်းတို့ နှစ်ဦးထဲမှ တစ်ဦးသည် အိန္ဒိယနွယ်ဖွားနှင့် ဆင်တူကြောင်း တောင်ဥက္ကလာပ မြို့မ ရဲစခန်းထံမှ စုံစမ်း သိရှိရသည်။
No comments:
Post a Comment