လျှိဝှက်ဥယျာဉ်

Search This Blog

Loading...

အဖွဲ့ဝင်မယ်..Followers

သတင်း


<<<< ကြိုဆိုပါတယ် ပျော်ရွှင်သောနေ့လေးဖြစ်ပါစေ >>>>

Monday, 19 August 2013

အပေါ်က လက်နှင့်ရေးသော်လည်း အောက်က ခြေနှင့်ဖျက်နေဆဲ

 အစိုးရသက်တမ်း ၂ နှစ်ကျော်လို့ သုံးနှစ်ထဲ ရောက်လာပြီဖြစ်တဲ့ ခုအချိန်မှာ သမ္မတရဲ့ လူထုအပေါ်ထားတဲ့ စေတနာကို ဘယ်သူကမှ ယုံမှားသံသယ ရှိမနေတော့ပါဘူး။ အစိုးရရဲ့ လုပ်ကိုင်ဆောင်ရွက်မှု တွေက သိပ်မထိ ရောက်သေးပေမယ့် စေတနာပိုင်း ကိုတော့လူတိုင်းက အနည်းဆုံး မဆိုးပါဘူးလို့ အသိအမှတ်ပြုကြပါတယ်။ (ခြွင်းချက်အနေနဲ့ အဆိုးမြင်သမား တချို့တလေတော့ ရှိနိုင်ပါတယ်။) လူများစုကတော့ လက်တွေ့ အခွင့်အရေး ရတာ မရှိသလောက် နည်းပါးလွန်းနေသေးပေမယ့် သမ္မတဟာ စိတ်ရင်းအမှန်နဲ့ ကြိုးစားလုပ်ဆောင်နေတယ်ဆိုတာ အသိအမှတ်ပြုကြပါတယ်။

အစိုးရ လုပ်ပေးသလောက် အထူးသဖြင့် အခြေခံလူတန်းစားတွေ ဘာမှ သိပ်ထူးထူးခြားခြား ခံစားခွင့် မရကြသေးရခြင်းဟာ အကြောင်းရင်း များစွာရှိပြီး အဲဒီအကြောင်းတွေထဲမှာ အဓိကအကြောင်းတရား သုံးပါး ရှိပါတယ်။

၁။ အာဏာရှင်စနစ် ကာလကြာရှည်စွာ ကြီးစိုးလွှမ်းမိုးခဲ့ခြင်း

၂။ အခြေခံ အဆောက်အဦများ ခက်ခဲစွာ တည်ဆောက်နေရခြင်းနဲ့

၃။ အုပ်ချုပ်ရေးနဲ့ စီမံခန့်ခွဲရေးဆိုင်ရာ အောက်ခြေအဆင့်တာဝန် ယူထားသူများက ထိရောက်တဲ့ ပြုပြင်ပြောင်းလဲမှုများ ပြုလုပ်ရန်ပျက်ကွက် နေခြင်းတို့ဖြစ်ပါတယ်။

နှစ်ပေါင်းများစွာ အာဏာရှင်စနစ်အောက်မှာ ပျက်စီးယိုယွင်းခဲ့ရတဲ့ တိုင်းပြည်မှာ အခြေခံအဆောက်အဦများကို လွယ်လွယ်ကူကူတည် ဆောက်လို့မရနိုင်တာဟာ အကျိုးအကြောင်း ဆီလျော်ပါတယ်။ အချိန်ယူ ရမယ့်အလုပ်ဆိုတာလည်း ငြင်းလို့မရပါဘူး။ အခြေခံအဆောက်အဦများ ကောင်းမွန်အောင် တည်ဆောက်ပြီးမှသာ၊ လူသားရင်းမြစ်များကို ကျကျနန ပြုစုပျိုးထောင်ပြီးမှသာ တိုင်းပြည်စီးပွားရေး သိသိသာသာတိုးတက် ကောင်းမွန်လာမယ်ဆိုတာလည်း ဒီကနေ့ လူတိုင်းပြောဆို ဆွေးနွေးနေကြ ရတဲ့ အကြောင်းခြင်းရာများ ဖြစ်ပါတယ်။ ပြည်တွင်းက အင်အားများနဲ့ နိုင်ငံတကာရဲ့ ပံ့ပိုးကူညီမှုများပေါင်းစပ်ပြီး အားသွန်ခွန်စိုက် ကြိုးစားတည်ဆောက်ရင်တောင်မှ အချိန်ယူရဦးမှာဖြစ်ပါတယ်။ တကယ်ကြိုးစားကြမယ် ဆိုရင် အချိန်တန်တဲ့အခါ အားလုံး အဆင်ပြေသွားမှာပါပဲ။ နိုင်ငံခြား ရင်းနှီး မြှုပ်နှံမှုတွေလည်း အဲဒီတော့မှပဲ အလုံးအရင်းဝင်လာဖို့ မျှော်လင့်လို့ရပါမယ်။

ဒါပေမဲ့ အောက်ခြေအဆင့် အုပ်ချုပ်ရေးနဲ့စီမံခန့်ခွဲရေး တာဝန်ယူ ထားတဲ့သူ တော်တော်များများက နိုင်ငံတော်ရဲ့ အပြောင်းအလဲများနဲ့ လိုက်လျောညီထွေ လိုက်ပါပြောင်းလဲဖို့ ပျက်ကွက်နေတဲ့ ကိစ္စကတော့ ချက်ချင်း လက်ငင်းဖြေရှင်းလို့ရတဲ့ ပြဿနာဖြစ်ပြီး အစိုးရအနေနဲ့ လက်ရှိ အနေအထားအတိုင်း ဆက်လက် လက်ခံထားမယ်ဆိုရင် တိုင်းပြည် တိုးတက်ရေး ဒီမိုကရေစီ ပီပြင်ရေးတို့ကို ဘယ်လိုမှမျှော်လင့်လို့ မရနိုင်ဘူး ဆိုတာ အထူးတလည် သတိပေးလိုပါတယ်။ ဒီပြဿနာကို ချက်ချင်း လက်ငင်း ထိထိရောက်ရောက် ကိုင်တွယ်ဖြေရှင်းရင် လူထုရဲ့အမြင်လည်း လုံးဝပြောင်းလဲသွားမှာဖြစ်ပါတယ်။ အခြေခံအဆောက်အဦတွေ မကောင်းသေးပေမယ့် ထိုက်သင့်သလောက် စီးပွားရေး ကောင်းလာနိုင်ပါတယ်။ လူတွေက နိုင်ငံရေးအပြောင်းအလဲကို လုံးဝယုံကြည်စိတ်ချသွားမှာ ဖြစ်ရုံမကဘဲ ဒီမိုကရေစီလည်း အလျင်အမြန် ပီပြင်လာမှာဖြစ်ပါတယ်။ လူထု ပူးပေါင်းပါဝင်ဆောင်ရွက်မှု အရှိန်အဟုန်မြင့်လာမှာ ဖြစ်ပါတယ်။

အစိုးရသစ်ပေါ်ပေါက်ပြီး အပြောင်းအလဲတွေကို အရှိန်အဟုန်နဲ့ အားသွန်ခွန်စိုက် လုပ်ကိုင်နေပေမယ့် သိပ်ထိထိရောက်ရောက်မရှိလှဘူး ဆိုတာ ဘယ်သူမှမငြင်းနိုင်ပါဘူး။ သမ္မတရဲ့သဘောထားကို ကောင်းစွာ သိရှိနားလည်ကြလို့သာ စစ်အစိုးရကနေ အသွင်ပြောင်းလာတဲ့ အရပ်သား အစိုးရကို လူထုက စိတ်ရှည်ရှည်ထားပြီး စောင့်ကြည့်နေကြတာ ဖြစ်ပါတယ်။

အောက်ခြေအဆင့်ကို အုပ်ချုပ်ရေးတာဝန်နဲ့ စီမံခန့်ခွဲရေးတာဝန် တွေကိုပေးအပ်ဖို့ လူပုဂ္ဂိုလ်များ ရွေးချယ်ခန့်အပ်တဲ့ အစိုးရရဲ့မူပေါ်မှာ ပြဿနာတော်တော်များများက မြစ်ဖျားခံနေတာပါ။ ဦးနေဝင်းလက်ထက် ကစပြီး အကျင့်လုပ်ခဲ့တဲ့ တပ်ကလူတွေကို အရပ်ဘက်အသွင်ပြောင်း တာဝန်ပေးခန့်အပ်တဲ့ အလုပ်က အခုအချိန်ထိ ဘာမှအပြောင်းအလဲ မရှိသေးပါဘူး။ တော်တော်များများလည်း ပြောနေဆိုနေကြပေမယ့် အစိုးရက မသိကျိုးကျွန်လုပ်နေတာလား၊ အခြေအနေအရ ကိုင်တွယ်ဆောင်ရွက်ဖို့ မဖြစ်နိုင်သေးတာလားတော့ မသိရပေမယ့် ဒီကိစ္စကို ထိထိရောက်ရောက် အပြောင်းအလဲတွေ မလုပ်ဘူးဆိုရင် တိုင်းပြည်တည်ဆောက်ရေး လုပ်ငန်းတွေ ထိခိုက်တော့မယ့်အနေအထားကို ရောက်လာပါပြီ။

အစိုးရ ဌာနတိုင်းမှာ (အခုခေတ်မှာ မိုးကျရွှေကိုယ်တွေလို့ နာမည်ရနေတဲ့ ) တပ်ဘက်က ပြောင်းလာတဲ့အရာရှိတွေ ကြီးစိုးနေပါတယ်။ အရပ်ဘက်က အရည်အချင်း၊ အတွေ့အကြုံ ပြည့်ဝစွာနဲ့ ရာထူးတစ်ဆင့်ချင်း တက်လာကြသူတွေက သူတို့လက်အောက်မှာ လုပ်ရကိုင်ရတာ ဖြစ်ပြီးတော့ ကိုယ့်သဘောနဲ့ ကောင်းမယ်ထင်လို့ လုပ်လိုက်ရင် အနည်းဆုံး အဆူအကြိမ်း ခံရပြီး အများဆုံး ရာထူးနေရာလေး ထိခိုက်နိုင်တာဖြစ်လေတော့ ခိုင်းတဲ့အတိုင်းပဲ ပါးစပ်ပိတ်ပြီး လုပ်နေကြရပါတယ်။

မဆလခေတ် တိုင်းပြည်ပျက်ခဲ့ရခြင်း အကြောင်းရင်းတွေထဲမှာ ဒီကိစ္စဟာလည်း အရေးပါတဲ့ အကြောင်းရင်းကြီးတစ်ရပ်ဆိုတာ သတိမမေ့သင့်ပါဘူး။

ကျွန်တော်တို့သာမန်ပြည်သူတွေ ကောင်းကောင်းသိကြပြီး လူထုနဲ့လည်း တိုက်ရိုက်ထိစပ်နေတဲ့ အုပ်ချုပ်ရေး၊ စီမံခန့်ခွဲရေးဆိုင်ရာ ပြဿနာ တချို့ကို ဒီနေရာမှာ ဥပမာအနေနဲ့ ဖော်ပြလိုပါတယ်။
မြို့နယ်လျှပ်စစ်ရုံးတွေမှာ တာဝန်အရှိဆုံးပုဂ္ဂိုလ်တွေက တပ်ကလူတွေ များပါတယ်။ မြို့နယ်အင်ဂျင်နီယာတွေက သူတို့အောက်ကပါ။ ပြီးခဲ့တဲ့ လလောက်က မြန်မာ့ရုပ်မြင်သံကြား အစီအစဉ်မှာ မိုးရွာပြီဖြစ်လို့ ရပ်ကွက်တွေ ၂၄ နာရီအပြည့် မီးပေးတော့မယ့်အကြောင်း စာတန်းထိုးပါ တယ်။ ထိုးနေတဲ့ စာတန်းမဆုံးခင် မီးပျက်သွားတာ ၁၀နာရီလောက်ကြာ ပါတယ်။ အစိုးရကတော့ ရပ်ကွက်တွေ မီးမှန်နေပြီလို့ သိထားမှာပါပဲ။ အခုလည်း မိုးတွင်းကာလကြီး မီးခဏခဏပျက်ပါတယ်။ မြို့နယ်လျှပ်စစ် အင်ဂျင်နီယာက မီးမှန်ဖို့ကိစ္စမှာ လုပ်လို့ရတာ ရှိရင်တောင်မှ အဆူအကြိမ်း မခံချင်တာတစ်ကြောင်း၊ အုပ်ချုပ်ရေးအရာရှိကို မကျေလည်တာက တစ်ကြောင်းကြောင့် အမိန့်မပေးရင် မလုပ်တော့ပါဘူး။

သူက ကောင်းမယ်ထင်လို့ လုပ်တာကိုင်တာကိုလည်း သူ့အပေါ်က မိုးကျရွှေကိုယ်က စိတ်မထင်ရင်မထင်သလို ပါဝါပြတာ၊ ဟိန်းဟောက်တာ ရှိလေတော့ အင်ဂျင်နီယာ အပါအဝင် လျှပ်စစ်ဌာနဝန်ထမ်းတွေက မသိချင် ဟန်ဆောင်နေကြပါတော့တယ်။

ပြန်မပြောရဲလို့ မပြောကြပေမယ့် အမိန့်မရဘဲ ဘာကိုမှ မလုပ်ကြတော့တဲ့အခါ မိုးတွင်းကြီးမီးပျက်တဲ့ ပြဿနာက ပိုပိုဆိုးလာပါတော့တယ်။ မီးပျက်ရတဲ့တခြား အကြောင်းတရားတွေလည်း ရှိနိုင်ပေမယ့် တကယ်တတ်ကျွမ်းပြီး အတွေ့အကြုံရင့်ကျက်တဲ့ ပညာရှင် ဖြစ်သူတွေကိုများ လုပ်ပိုင်ခွင့် အပြည့်အဝပေးလိုက်ရင် ပြဿနာတွေ တော်တော်များများဟာ အလွယ်တကူ ပြေလည်သွားမှာ သေချာပါတယ်။

နောက်ထပ်ဖော်ပြချင်တဲ့ ဥပမာတစ်ခုကတော့ တန်ဖိုးနည်းဖုန်းတွေ ရပ်ကွက်အုပ်ချုပ်ရေးရုံး တွေကတစ်ဆင့် မဲစနစ်နဲ့ပေးတဲ့ ကိစ္စပါ။ နိုင်ငံတော် သမ္မတကိုယ်တိုင်က အခြေခံလူတန်းစားတွေ သုံးစေချင်တဲ့ စေတနာ အရင်းခံနဲ့ တန်ဖိုးနည်းဖုန်းတွေကို မဖြစ်ဖြစ်အောင် ရောင်းချပေးဖို့ ခဲရာခဲ ဆစ် စီစဉ်ဆောင်ရွက်ခဲ့ရတာပါ။

မသမာမှုတွေ မဖြစ်အောင်လည်း တော်တော်ကြီး ဂရုတစိုက်စီစဉ် ဆောင်ရွက်ထားတာပါ။ အဲဒီကြားထဲကနေ ရပ်ကွက်အုပ်ချုပ်ရေးတာဝန်ယူ ထားသူများက မရရတဲ့နည်းနဲ့ အလွဲသုံးစား လုပ်နေကြပါတယ်။

ဖုန်းတွေစပေးတဲ့ လတုန်းက ရပ်ကွက်တော်တော်များများမှာ စနစ် တကျ လုပ်တာကိုင်တာ ရှိခဲ့ပါသေးတယ်။ ရပ်ကွက်ထဲက ဖုန်းလျှောက်လွှာတင်တဲ့သူရဲ့အမည်ရယ်၊ မဲပေါက်ရင် ပေါက်တဲ့ ဖုန်းနံပါတ်ရယ်ကို တစ်ရပ်ကွက်လုံး ကြားအောင် လော်စပီကာကြီးနဲ့ ကြေညာပေးပါတယ်။ လူနာမည်နဲ့ ပေါက်တဲ့ ဖုန်းနံပါတ်ကို ရပ်ကွက်ရုံးက ကြော်ငြာသင်ပုန်းမှာ တစ်ခါတည်း ချရေးပေးပါတယ်။ မသမာတာ တစ်ခုခုလုပ်ဖို့ ဘယ်လိုမှမလွယ်ပါဘူး။

အခု နှစ်လ သုံးလကြာလာတော့ အခြေအနေတွေက ပြောင်းလဲလာ ပါတော့တယ်။ ရပ်ကွက်တော်တော်များများမှာ မသမာမှုတွေကို ရတဲ့နည်းနဲ့ ကြံစည်လုပ်ကိုင်လာကြပြီး ကျော်မကောင်းကြားမကောင်း ပြဿနာတွေ စလာပါတော့တယ်။

ရပ်ကွက်အုပ်ချုပ်ရေး တာဝန်ယူထားသူ အများစုက အစကတည်းက ရပ်ကျိုးရွာကျိုးလုပ်ချင်လို့ တာဝန်ယူကြတာမှ မဟုတ်ကြလေတော့ အခွင့်အရေးကို မရရတဲ့နည်းနဲ့ အတင်းရော အဓမ္မရော ရယူလာ ကြပါတယ်။

၁။ ဖုန်းမဲပေါက်တဲ့သူကို ကြေညာပေးဖို့ လော်စပီကာကြီးတွေ သုံးရာကနေ လက်ကိုင်စပီကာ သေးသေးလေးတွေနဲ့ ပြောင်းကြေညာပါတယ်။ (မဲတကယ်ပေါက်ပြီး မဲနှိုက်တာ လာမကြည့်တဲ့သူတွေ သူတို့မဲပေါက်တာ တော်ရုံတန်ရုံနဲ့ မသိနိုင်အောင် ရည်ရွယ်တာပါ။)

၂။ မျက်နှာမွဲလို့ ယူဆရသူများ၊ ဆင်းရဲသားအိမ်ငှားများရဲ့ နာမည်တွေကို မဲစနှိုက်ကတည်းက ဘေးဖယ်ထားပါတယ်။ (သူတို့ဘယ်လိုမှ မပေါက်နိုင်တော့တဲ့အပြင် အိမ်ငှားတွေဆိုတော့ တော်ရုံတန်ရုံ ရပ်ကွက်လူကြီးတွေကို ပြန်မပြောရဲ မှန်းသိလို့ပါ။)

၃။ ကျောထောက်နောက်ခံ မရှိဘူးလို့ ယူဆရသူတွေနဲ့ ပေါက်မဲစာရင်း ကြေညာစဉ်က လာနားထောင်မထားတဲ့ သူတွေက ဖုန်းပေါက်လို့ လာထုတ်ရင် ဖုန်းထုတ်ပေးဖို့ ငြင်းပါတယ်။ လာနားမထောင်သူ တော်တော် များများက မဲပေါက်တာမသိတော့ လာလည်းမထုတ်တော့ပါဘူး။ ကိုယ်တိုင် လာနားထောင်ပြီးတော့ ကြောက်တတ်တဲ့သူလို့ ထင်မြင်ယူဆရသူများ မဲပေါက်လို့လာထုတ်ရင် မဲမပေါက်ဘူး။ နားကြားလွဲလို့ဆိုတဲ့ စကားလုံးသုံးပြီး ငြင်းလွှတ်ပါတယ်။ တော်ရုံလူက အစဉ်အဆက် ကြောက်လာ ခဲ့ ရတဲ့ ရပ်ကွက်ရုံးကို ပြန်မပြောရဲပါဘူး။ ပါးစပ်ပိတ်ပြီး ပြန်သွားကြပါတယ်။ နည်းနည်း ထက်ထက်မြက်မြက်ရှိပြီး မဟုတ်မခံစိတ်နဲ့ တိုင်မယ်တောမယ်လုပ် လာရင်တော့ အဲဒီလူကို ကျွန်တော်တို့ မှားသွားလို့ပါ ဆိုတဲ့စကားနဲ့ တောင်းပန်ပြီး ဖုန်းထုတ်ပေးလိုက်ပါတယ်။

၎။ တချို့ရပ်ကွက်တွေမှာဆိုရင် ဖုန်းမဲနှိုက်ခါနီးမှာ ဖုန်းတွေကို လက်သိပ်ထိုး ကြိုရောင်းစားထားတဲ့ ရပ်ကွက် လူကြီးတွေတောင်ရှိပါတယ်။

၅။ မဲနှိုက်ပေးရမယ့် ဖုန်းအရေအတွက်ကို အစကတည်းက လျှော့ထားပြီးရောင်းစားပါတယ်။
၆။ မဲပေါက်တဲ့ဖုန်းနံပါတ် တွေကို တစ်ခါတည်းကြေညာပြီး ချက်ချင်း ကြော်ငြာဘုတ်မှာ မရေးတော့ဘဲ ရောင်းစားရင် ဈေးပိုရမယ့်နံပါတ်တွေကို ဖယ်ထားပါတယ်။

အထက်ပါပြဿနာများကို ဥပမာအနေနဲ့ ဖော်ပြတာသာဖြစ်ပြီး ဌာနဆိုင်ရာ တော်တော်များများမှာ အလားတူပြဿနာတွေ ရှိနေတာပါ။ ဒါတွေဟာ အစိုးရအနေနဲ့ ချက်ချင်းလက်ငင်း ဖြေရှင်းလို့ရတဲ့ ပြဿနာတွေဖြစ်ပြီးတော့ မဖြေရှင်းဘဲ ဒီအတိုင်းထားရင် လက်ရှိအစိုးရက ဦးဆောင်ပြီး အားသွန်ခွန်စိုက်လုပ်နေတဲ့ တိုင်းပြည်တည်ဆောက်ရေး လုပ်ငန်းကို မလွဲမသွေ ထိခိုက်လာပါလိမ့်မယ်။ အခြေခံလူတန်းစား ဆိုတာက မီးပျက်လည်း အစိုးရကိုပဲ အပြစ်တင်ပါတယ်။ ရပ်ကွက်ရုံးတွေက မတရား လုပ်ရင်လည်း အစိုးရကိုပဲ အပြစ်တင်ပါတယ်။ တကယ်လည်း တာဝန် အရှိဆုံးက အစိုးရပဲဖြစ်ပါတယ်။

အရည်အချင်းလည်းရှိ အမျိုးသားရေးစိတ်ဓာတ်လည်းရှိတဲ့ သူတွေကို ရွေးချယ်ပြီး တာဝန်ပေးလို့ရပါတယ်။ အလွဲသုံးစား လုပ်နေကြတဲ့သူတွေ၊ အပေါ်က လက်နဲ့ရေးသမျှ အောက်ကနေ ခြေနဲ့ချည်းဖျက်နေ ကြတဲ့သူတွေကို ထိထိရောက်ရောက် ပြတ်ပြတ်သားသား အရေးယူဆောင်ရွက်ဖို့ လိုပါတယ်။ ဒီလိုမှမဟုတ်ရင် ဘာတစ်ခုမှ အရာထင်မှာ မဟုတ်ဘဲ အမှန်တကယ် လုပ်နေကိုင်နေတဲ့ အလုပ်တွေက သေချာပေါက် သဲထဲရေသွန် ဖြစ်နေဦးမှာပါပဲ။

၂ နှစ်ခွဲလောက် ကာလအတွင်းမှာ လမ်းမပေါ်က ကားတွေ ပိုစည်းကမ်းပျက်လာပါတယ်။ စပါယ်ယာတွေ၊ ဒရိုင်ဘာတွေက ပိုရမ်းကားလာပါတယ်။

အစိုးရဘဏ်တွေမှာ ငွေသွင်းငွေထုတ်လုပ်ရင် ပုဂ္ဂလိကဘဏ်တွေလို မြန်မြန်ဆန်ဆန် ဆောင်ရွက်ပေးနိုင်ခြင်း မရှိသေးပါဘူး။ ဌာနဆိုင်ရာတွေမှာ ကြိုးနီစနစ် ကိုလည်း ထိထိရောက်ရောက် မပယ်ဖျက်နိုင်သေးဘဲ နေရာတကာ ကြန့်ကြာမှုတွေ ရှိနေဆဲပါ။ ဒါတွေဟာ ချက်ချင်းလက်ငင်း ကိုင်တွယ်ဆောင် ရွက်မယ်ဆိုရင် ရနိုင်တဲ့ အုပ်ချုပ်ရေးနဲ့စီမံခန့်ခွဲရေး ဆိုင်ရာ ပြဿနာတွေ ဖြစ်ပါတယ်။ တိုင်းပြည် တိုးတက်ဖွံ့ဖြိုးရေးအတွက် အနှောင့်အယှက် အဟန့်အတားဖြစ်နေတဲ့ ကိစ္စတွေဖြစ်ပါတယ်။

အစိုးရအကြီးအကဲ ဖြစ်သူက ကိုယ်ကျိုးလုံးဝမဖက်ဘဲ တိုင်းကျိုးပြည်ကျိုး ထမ်းဆောင်နေတာလည်း သိလျက်နဲ့ အရှက်မရှိ သိက္ခာမဲ့ အမျိုးသားရေးစိတ်ဓာတ် ကင်းမဲ့တဲ့ တာဝန်ရှိ သူတွေကို ပြတ်ပြတ်သားသား ထိထိရောက်ရောက် အရေးယူတာမျိုးတွေ လုပ်မှသာ အရည်အချင်းရော စိတ်ဓာတ်ရေးရာပါ ကောင်းမွန်တဲ့ပြည်သူများကို ပြောင်းလဲတာဝန်ပေးမှသာ တိုင်းပြည်တည်ဆောက်ရေးဟာ အရှိန်အဟုန် ရလာနိုင်ပြီး လူထုတစ်ရပ်လုံးလည်း ဆင်းရဲတွင်းက အမှန်တကယ် လွတ်မြောက်နိုင် မယ့်အကြောင်း နိုင်ငံနဲ့လူထုကိုချစ်တဲ့စိတ်၊ နိုင်ငံတော်အကြီးအကဲရဲ့ စေတနာနဲ့ အလုပ်ကိုလေးစားပြီး ရည်မှန်းသလောက် အကောင်အထည် ပေါ်စေလိုသောစိတ်နဲ့ ရေးသားတင်ပြရခြင်းသာ ဖြစ်ပါကြောင်း။ ။

No comments:

နောက်ဆုံးတင်ပြီသမျှ..ဆက်ဖတ်ရန်...အောက်သို့