လျှိဝှက်ဥယျာဉ်

Search This Blog

Loading...

အဖွဲ့ဝင်မယ်..Followers

သတင်း


<<<< ကြိုဆိုပါတယ် ပျော်ရွှင်သောနေ့လေးဖြစ်ပါစေ >>>>

Wednesday, 17 July 2013

လွှတ်တော်အမတ်များရဲရင့်ပါ

လွှတ်တော်ကိုယ်စားလှယ်များ၏ အဆုံးအဖြတ်ရယူရန် မဲခွဲဆုံးဖြတ်သည့်အခါ မည်သည့်စနစ်ဖြင့် မဲခွဲဆုံးဖြတ်သည်ဖြစ်စေ လွှတ်တော်ကိုယ်စားလှယ်များအနေဖြင့် မိမိယုံကြည်ချက်အတိုင်း ပြည်သူ့မျက်နှာသာကြည့်၍ ရဲရဲဝံ့ဝံ့မဲပေးနိုင်ရန် လိုအပ်လာပါပြီ။

အဆိုများ၊ ဥပဒေကြမ်းများကို မဲခွဲဆုံးဖြတ်ရာတွင် ထောက်ခံသည့် ဆန္ဒကိုဖြစ်စေ၊ ကန့်ကွက်သည့်ဆန္ဒကို ဖြစ်စေမတ်တတ်ရပ်၍ ဆန္ဒပြုရပါက မတ်တတ်ရပ်မဲ ပေးသည့် အမတ်အရေအတွက် လျော့နည်းနေခြင်းမှာ ကောင်းသောအလားအလာတော့မဟုတ်ပါ။ မတ်တတ်ရပ် မဲပေးစနစ် ကျင့်သုံးပြီး ဆန္ဒပြုရသည့် ကိစ္စများတွင် ကိုယ်စားလှယ်များ ကန့်ကွက်စေလို၊ ထောက်ခံစေလိုသည့်ဘက်၏ ဆန့်ကျင်ဘက်ကိုသာ မတ်တတ်ရပ် မဲပေးစေပါက မိမိဆန္ဒကို ရဲရဲဝံ့ဝံ့ထုတ်ဖော်ရဲသူ လျော့နည်းမြဲဖြစ်သည်။

ထို့ကြောင့် လွှတ်တော်တွင် မဲခွဲဆုံးဖြတ်ရာ၌ စက်ခလုတ်နှိပ် မဲပေးရသည့် လျှို့ဝှက်မဲပေးစနစ် ကျင့်သုံးခြင်းသည်သာ အကောင်းဆုံးနည်းလမ်းဟု လွှတ်တော်ကိုယ်စားလှယ်များက ယုံကြည်ထားကြသည်။

“ကျွန်တော်တစ်ဦးတည်း သဘောကတော့ လျှို့ဝှက်မဲပေး စနစ်ကျင့်သုံးတာ အကောင်းဆုံးလို့ထင်ပါတယ်။ ဒါပေမဲ့ မတ်တတ်ရပ်ပြီး မဲပေးဖို့လိုတာလည်း ရှိရင်ရှိမှာပေါ့။ ဘယ်လိုပဲဖြစ်ဖြစ် မဲပေးတဲ့ လွှတ်တော်ကိုယ်စားလှယ်ရဲ့ သဘောထားက အဓိကပါပဲ။ သူယုံကြည်ရင် သူ့ရပ်တည်ချက်မှန်ကန်ရင် မတ်တတ်ရပ်ပြီးလည်း မဲပေးရဲရမှာပေါ့” ဟု ပြည်ခိုင်ဖြိုးပါတီမှ ပြည်သူ့လွှတ်တော် ကိုယ်စားလှယ် ဦးအောင်သိန်းလင်းကပြောလာသည်။

ပြည်သူလူထု၏ အကျိုးစီးပွားထိခိုက်နိုင်သည့် ဥပဒေများ အဆိုများ၊ ပြည်သူကကန့်ကွက်ရန် ဆန္ဒရှိနေသည့် အကြောင်းအရာများကို ဆုံးဖြတ်သည့်အခါမှာပင် ကန့်ကွက်လိုသူများကို မတ်တတ်ရပ်၍ ဆန္ဒပြုစေပါက ကန့်ကွက်သူမရှိဘဲ အဆိုများ၊ ဥပဒေများက အောင်မြင်စွာ အတည်ဖြစ်သွားခဲ့သည်။

ပြည်သူ့လွှတ်တော်ကိုယ်စားလှယ်ဦးရဲထွန်းကလည်း “မဲခွဲရင်တော့ လျှို့ဝှက်စနစ်နဲ့ မဲပေးတာ အကောင်းဆုံးပါပဲ။ မတ်တတ်ရပ်ပြီး မဲပေးတော့ တော်ရုံတန်ရုံက မတ်တတ်မရပ်ချင်ကြဘူး။ ဒီတော့ ဖြစ်စေချင်တဲ့ဘက်ကို ထိုင်ခိုင်းရင် သေချာတယ်။ ဒီအတိုင်းဖြစ်မှာလို့တောင် ပြောလာကြတာတွေရှိတယ်ပေါ့” ဟုဆိုသည်။

ပါလီမန်ဒီမိုကရေစီကျင့်သုံးသည့်  နိုင်ငံများတွင် စက်ခလုတ် နှိပ်၍ လျှို့ဝှက်မဲပေးခြင်းကို အသုံးပြုကြပြီး မြန်မာ့လွှတ်တော်နိုင်ငံရေးတွင်လည်း လျှို့ဝှက်မဲပေးခြင်းကသာ အကောင်းဆုံးဖြစ်မည်ဟု လွှတ်တော်ကိုယ်စားလှယ်များသာမက စောင့်ကြည့်လေ့လာသူနေကြသည့် ပြည်သူများကပါ ယူဆကြသည်။

လက်ရှိ အခြေအနေအရ မြန်မာ့လွှတ်တော်အမတ်မင်းများကို မိမိတို့သက်ဆိုင်ရာ မိခင်ပါတီများ၏ ရပ်တည်ချက်က လွှမ်းမိုးလျက်ရှိသည်ကို ပေါ်လွင်စွာ တွေ့မြင်ရမည်ဖြစ်သည်။ ဒါကလည်း အမတ်များမှာ ပါတီ၏ မူဝါဒ သဘောထားများနှင့် လွှတ်တော်တွင် လာရောက်ရပ်တည်နေကြရသည့်အတွက် သိပ်မဆန်းတော့ပါဟု မြန်မာ့နိုင်ငံရေးလေ့လာသုံး သပ်သူတစ်ဦးကထင်ကြေးပေးသည်။

မတ်တတ်ရပ်မဲပေးခြင်း၊ အသံဖြင့် မဲပေးဆုံးဖြတ်ခြင်းစသည်တို့က ဒီမိုကရေစီသက်တမ်း နုနယ်သေးသည့် ကာလအတွင်း မြန်မာလွှတ်တော်အမတ်အများစုကို ရဲဝံ့မှုရှိလာစေဦးမည်မဟုတ်ဘဲ လျှို့ဝှက်မဲပေးခြင်းသည်သာလျှင် ယင်းအမတ်တစ်ဦးချင်းစီ၏ ဆန္ဒအမှန်ကို ပေါ်ထွက်စေနိုင်ပါလိမ့်မည်။ သို့မှာသာလျှင် ပြည်သူ့ဆန္ဒများက အမှန်တကယ်အကောင်အထည် ပေါ်လာနိုင်မည်ဖြစ်သည်။

ထိုအကြောင်းခြင်းရာများက လွှတ်တော်နာယက(သို့မဟုတ်) ဥက္ကဋ္ဌ၏ လုပ်ပိုင်ခွင့်အာဏာပေါ်မှာလည်း များစွာမူတည်နေပါသည်။ လွှတ်တော်တွင်း မဲပေးနည်းစနစ်ကို စက်ခလုတ်ကို အသုံးပြု၍ လျှို့ဝှက်စွာဆန္ဒပြုသည့် နည်းလမ်း၊ ဆန္ဒမဲလက်မှတ်ကို အသုံးပြု၍ လျှို့ဝှက်စွာ ဆန္ဒမဲပေးရသည့်နည်းလမ်း၊ မတ်တတ်ရပ်ဆန္ဒပြုသည့်နည်းလမ်းဟူ၍ နည်းဥပဒေပြဋ္ဌာန်းထားရာတွင် လွှတ်တော်နာယက(သို့မဟုတ်) ဥက္ကဋ္ဌက ပိုမိုအကျိုးပြုနိုင်မည့်နည်လမ်းကို ရွေးချယ်အသုံးပြုပေးသင့်သည်။ လွှတ်တော်ကိုယ်စားလှယ်များကတော့ အကြံပြုရုံမျှသာ တတ်နိုင်သည့်အတွက် ဖြစ်သည်။

“လွှတ်တော်တွင်း မဲပေးမယ့် စနစ်ကို လွှတ်တော်ဥက္ကဋ္ဌတွေက ရွေးချယ်သတ်မှတ်ပါတယ်။ အဲဒီအခါ လွှတ်တော်ကိုယ်စားလှယ် တစ်ဦးချင်းစီရဲ့ ဆန္ဒအမှန်ကို ဖော်ပြနိုင်မယ့်နည်းကို ပိုသုံးသင့်တယ်လို့ထင်ပါတယ်” ဟု နိုင်ငံရေးလေ့လာသုံးသပ်သူ ဒေါက်တာရန်မျိုးသိမ်းက မှတ်ချက်ပေးသည်။ ၎င်းကပင် ဆက်လက်၍ “လျှို့ဝှက်စက်ခလုတ်နဲ့ မဲပေးစနစ်က တစ်ဦးချင်းစီရဲ့ ဆန္ဒကို လျှို့ဝှက်ဖော်ထုတ်နိုင်လို့ပါ။ အဲဒီ နေရာမှာ လျှို့ဝှက်စက်ခလုတ်နဲ့ မဲပေးတာကို နည်းပညာအရ စောင့်ကြည့်တာမျိုးရှိ၊ မရှိ၊စက်ခလုတ်တွေဟာ တကယ်ပဲနှိပ်တဲ့အတိုင်း ပေါ်၊မပေါ်ဆိုတာတွေကိုလည်း စစ်ဆေးကြည့်ဖို့လို့မယ်ထင်ပါ တယ်””ဟု ဆက်ပြောသည်။

စက်ခလုတ်နှိပ်၍ မဲပေးရာတွင် ထောက်ခံခြင်း၊ ကန့်ကွက်ခြင်းပြုလုပ်မည့် ကိုယ်စားလှယ်က မိမိထိုင်ခုံရှိ စက်ခလုတ်ကိုနှိပ်၍ ထိုင်ရာမှပင်မဲပေးနိုင်သည်။ မဲပေးသည့်အရေအတွက်ကို ဘေးနံရံများရှိ အီလက်ထရွန်နစ်ဖန်သားပြင်က တိတိကျကျဖော်ပြမည်ဖြစ်ရာ မည်သူက မည်သည့် မဲပေးသည်ကို သိနိုင်မည်မဟုတ်ပေ။

ဆန္ဒမဲလက်မှတ်ဖြင့် မဲပေးရာတွင် ကိုယ်စားလှယ်များ၏ ရှေ့ကွက်လပ်၌ မဲပုံးများကိုထားရှိမည်ဖြစ်ပြီး ထိုသို့မဲလက်မှတ်ဖြင့် မဲပေးခြင်းကို မကျင့်သုံးဖူးသေးကြောင်း သိရသည်။

မတ်တတ်ရပ်၍ ဆန္ဒပြုသည့် နည်းလမ်းမှာတော့ ထောက်ခံသူ၊ ကန့်ကွက်သူများက ကိုယ်တိုင်မတ်တတ်ရပ်၍ ဆန္ဒပြုရခြင်းဖြစ်ရာ မည်သူက ကန့်ကွက်သည်၊ မည်သူက ထောက်ခံသည်ကို အထင်းသားမြင်နိုင်သောကြောင့် အနှောင်အဖွဲ့မကင်းသည့် ကိုယ်စားလှယ်များအတွက် အခက်အခဲဖြစ်ရကာ ခပ်မဆိတ်နေကြသည်ကများသည်။

ပြီးခဲ့သည့် ရက်ပိုင်းများက ကျင်းပခဲ့သော ပြည်သူ့လွှတ်တော် ပုံမှန်အစည်းအဝေးများတွင် နိုင်ငံအတွက် အရေးကြီးအဆိုနှစ်ခုဖြစ်သော ဆက်သွယ်ရေးနှင့် ပတ်သက်သည့် အရေးကြီးအဆိုနှင့် စာနယ်ဇင်းပုံနှိပ်ဥပဒေကြမ်းတို့ကို ကန့်ကွက်သူမရှိ အတည်ပြုထောက်ခံခဲ့ခြင်းက လွှတ်တော်ကိုယ်စားလှယ်များ၏ ရပ်တည်ချက်အပေါ်မေးခွန်းထုတ်စရာ ဖြစ်လာခဲ့သည်။

The Voice Daily သတင်းစာ အယ်ဒီတာချုပ် ဦးကျော်မင်းဆွေကလည်း “မီဒီယာလောကသားအားလုံးက ပြင်းပြင်းထန်ထန် ဆန့်ကျင်ကန့်ကွက်နေတဲ့ကြားက ပြန်ကြားရေးဝန်ကြီးဌာနက ရေးဆွဲထားတဲ့ ပုံနှိပ်ခြင်းနဲ့ ထုတ်ဝေခြင်းလုပ်ငန်း ဥပဒေမူကြမ်းကို ပြည်သူ့လွှတ်တော်က ကန့်ကွက်သူမရှိ(ကန့်ကွက်သူမရှိ)လက်ခံလိုက်တယ်။ ဒီတစ်ကြိမ်နဲ့ဆို ပြည် သူ့လွှတ်တော်က ကန့်ကွက်သူမရှိ လက်ခံတာ ရက်ပိုင်းအတွင်း နှစ်ကြိမ်ရှိပြီ”ဟု ၎င်း၏ ဖေ့စ်ဘွတ်ခ်စာမျက်နှာတွင် ဇူလိုင် ၁၀ ရက်က ရေးသားခဲ့သည်။

အတည်ပြုမည့်အဆိုများ၊ ဥပဒေများအပေါ် သဘောတူ၊ မတူကို မတ်တတ်ရပ်မဲခွဲဆုံးဖြတ်ရာတွင် ရဲဝံ့မှုမရှိခြင်းနှင့် သဟဇာတမဖြစ်ကြခြင်းတို့ကို ပြည်သူ့လွှတ်တော်တွင် အများဆုံးတွေ့ရသည်ဟု လွှတ်တော်ကိုယ်စားလှယ်တို့က ပြောကြသည်။ တိုင်းပြည်အတွက် အရေးကြီးအဆိုများကို အတိုက်အခံပါတီကြီးဖြစ်သည့် အမျိုးသားဒီမိုကရေစီအဖွဲ့ချုပ်မှ ကိုယ်စားလှယ်များအပါအ၀င် မည်သည့်ကိုယ်စားလှယ်ကမှ မတ်တတ်ထရပ်ခြင်းမရှိသည့် အစည်းအဝေးနေ့ရက်များကို ပြည်သူများက သဘောကျနေကြ သည်တော့မဟုတ်ပါ။

“လွှတ်တော်ထဲမှာ ပါဝါ Balance က သိပ်မဖြစ်သေးဘူးဆိုတော့ အချို့ကိစ္စတွေကို မဲခွဲတဲ့ အခါမှာ လျှို့ဝှက်စနစ်ကို မသုံးဘဲ မတ်တတ်ရပ်တဲ့စနစ်ကို သုံးနေတော့ လူများတဲ့ ဘက်ကိုဝင်ပြီး ရပ်ပေးလိုက်ရတဲ့ သဘောတွေ ဖြစ်နေတယ်။ တကယ်ဆို လျှို့ဝှက်မဲပေးစနစ်ကို သုံးတာ ပိုထိရောက်ပြီး ပိုပြီးမှန်ကန်တဲ့ ထောက်ခံမဲ၊ ကြားနေမဲအရေအတွက်ကို သိနိုင်မယ်လို့မြင်တယ်” ဟု ကုမ္ပဏီဝန်ထမ်းတစ်ဦးဖြစ်သူအသက် (၃၂ )အရွယ် ကိုကျော်ဝဏ္ဏက ဆိုသည်။

အမျိုးသားလွှတ်တော်ကိုယ်စားလှယ်တစ်ဦးဖြစ်သူ ဒေါက်တာမြတ်ဉာဏစိုးက “အမျိုးသားလွှတ်တော်မှာတော့ ပြည်သူ့လွှတ်တော်လို သိပ်မရှိပါဘူး။ အမျိုးသမီးအခွင့်ခံစားခွင့်နဲ့ ပတ်သက်တဲ့ အဆိုတစ်ခုဆိုရင် မတ်တတ်ရပ်ပြီး မဲပေးရပေမယ့် မဲအရေအတွက် တူနေတာမျိုးတောင်ရှိတယ်” ဟု ပြောပါသည်။

အချို့သော ဥပဒေကြမ်းနှင့် အဆိုများအပေါ် တိတိကျကျနားလည်သဘောပေါက်ခြင်းမရှိမှုကလည်း မဲခွဲဆုံးဖြတ်ခြင်းကို ပြီးစလွယ်ဖြစ်သွားစေသည့် အချက်တစ်ခုဖြစ်နေသည်။ ထိုအချက်ကပင် ကန့်ကွက်သူမရှိ အတည်ပြုကြောင်းတို့ဖြင့် ပြီးဆုံးသွားရန် အကြောင်းဖန်လျက်ရှိသည်။

“အဆိုနဲ့ ဥပဒေကြမ်းကို ကန့်ကွက်သူမရှိ အတည်ပြုထောက်ခံခဲ့တဲ့အခါ မြန်မာ့ဆိုရှစ်လစ် လမ်းစဉ်ပါတီအစိုးရခေတ်က ပြည်သူ့လွှတ်တော်အစည်းအဝေးတွေကို ပြန်အမှတ်ရမိတယ်။ လွှတ်တော်ကိုယ်စားလှယ်တွေအနေနဲ့ ဆွေးနွေးနိုင်ဖို့ အားထုတ်သင့်ပါတယ်။ အဲဒီလိုဆွေးနွေးနိုင်ဖို့ဆိုတာ အကြောင်းအရာကို ကောင်းစွာ သိဖို့လည်း လိုတယ်။ မပိုင်နိုင်ရင်တော့ ထဆွေးနွေးတာထက် ထိုင်နေတာက ပိုကောင်းပါတယ်” ဟု ဒေါက်တာ ရန်မျိုးသိမ်းက သုံးသပ်သည်။

ဥပဒေအဓိကဖြင့် ဘွဲ့ရထားသူတစ်ဦးကလည်း “အချို့ဥပဒေတွေကို မဲပေးဆုံးဖြတ်တဲ့အချိန်ကျတော့ လွှတ်တော်ကိုယ်စားလှယ်တွေက ဥပဒေပိုင်းမှာ လေ့လာမှုအားနည်းရင် များတဲ့အဖွဲ့ နောက်ပါသွားနိုင်တယ်” ဟု သူ၏ အမြင်ကို ပြောသည်။

လွှတ်တော်အတွင်း မေးခွန်းထုတ်ခြင်း၊ အဆိုတင်သွင်းခြင်းတို့ကို ခပ်စိပ်စိပ်ပြုလုပ်လေ့ရှိသောကြောင့် လွှတ်တော်မင်းသားကြီးဟု နာမည်ကြီးသူ ပြည်သူ့လွှတ်တော် ကိုယ်စားလှယ် ဦးသိန်းညွန့်ကလည်း လွှတ်တော်တွင်းမတ်တတ်ရပ် ဆန္ဒပြရခြင်းအပေါ် အောက်ပါအတိုင်းမှတ်ချက်ပေးသည်။

“၀န်ကြီးဌာနတွေနဲ့ ပတ်သက်တဲ့ အဆိုတွေဥပဒေကြမ်းတွေမှာ မတ်တတ်ရပ်ခိုင်းတဲ့ နည်းလမ်းနဲ့တော့ လွှတ်တော်ကိုယ်စားလှယ်တွေရဲ့ ဆန္ဒအစစ်အမှန်ကို ရဖို့ အခက်အခဲရှိတယ်လို့ထင်တယ်။ ကျွန်တော်ကတော့ လွှတ်တော်တက်လာတိုင်းမှာ တတ်နိုင်သမျှ စက်ခလုတ်နည်းနဲ့ ဆန္ဒရယူစေချင်တယ်”

ဥပဒေပြုရေးမဏ္ဍိုင်၏ နာယက၊ ဥက္ကဋ္ဌအပါအ၀င် လွှတ်တော်ကိုယ်စားလှယ်များသည် မိမိတို့ ဆုံးဖြတ်အတည်ပြုရမည့် ဥပဒေကြမ်းများ၊ အဆိုများမှာ မိမိတို့ကို မဲပေးရွေးချယ်လိုက်ကြသည့် ပြည်သူများအတွက် အလွန်အရေးကြီးသည့်အတွက် ပြည်သူ့မျက်နှာထောက်ထားလျက် ပြတ်ပြတ်သားသားရပ်တည်ကြဖို့ လိုအပ်နေသည့် အချိန်ပင်ဖြစ်ပါသည်။

No comments:

နောက်ဆုံးတင်ပြီသမျှ..ဆက်ဖတ်ရန်...အောက်သို့