Search This Blog

အဖွဲ့ဝင်မယ်..Followers

သတင်း


<<<< ကြိုဆိုပါတယ် ပျော်ရွှင်သောနေ့လေးဖြစ်ပါစေ >>>>

Friday 26 July 2013

ဗိုလ်ချုပ်စိုးရှိန် သေနတ်ဖြင့် ခြိမ်းခြောက်မှု တောင်သူများကို အမှုဖွင့်ခွင့်မပေး


တောင်သူများကို သေနတ်ဖြင့် ခြိမ်းခြောက်ခဲ့သည့် ဗိုလ်ချုပ် စိုးရှိန်ကို ယခင် နအဖ အကြီးအကဲ ဗိုလ်ချုပ်မှူးကြီးဟောင်း သန်းရွှေ၏ ကိုယ်ရေးအရာရှိအဖြစ် ၎င်း၏ဘေး ကပ်လျက်တွင် မြင်တွေ့ရစဉ် 
နေပြည်တော် လယ်ဝေးမြို့နယ် ပေါက်မြိုင်အုပ်စု အင်တိုင်းသာရွာတွင် တောင်သူ ၃ ဦး ပိုင်ဆိုင်သော ဧက ၁၀၀ ၀န်းကျင်ရှိ သီးနှံစိုက်ပျိုးထားသည့် မြေပေါ်တွင် ဗိုလ်ချုပ်စိုးရှိန်က တောင်သူများအား သေနတ်ပြကာ ခြိမ်းခြောက်ခဲ့သည့် ဖြစ်ရပ်ကို ဒေသ အာဏာပိုင်များက အမှုဖွင့် မပေးသေးကြောင်း စုံစမ်း သိရှိရသည်။
ဇူလိုင်လ ၆ ရက်နေ့ နေ့လယ် ၁၁ နာရီခန့်က မိမိလယ်မြေကို အလုပ်သမား နှစ်ဦးနှင့် ပေါင်း ရှင်းလင်းနေစဉ် ဗိုလ်ချုပ် စိုးရှိန်ဆိုသူက တပည့် ၄ ဦးဖြင့် ၀င်ရောက်လာပြီး ၎င်း၏ ပစ္စတို သေနတ်ကိုထုတ်၍ ယာမြေထဲမှ မထွက်ပေးပါက ပစ်သတ်မည်ဟု အော်ဟစ် ခြိမ်းခြောက်ခဲ့သောကြောင့် ကြောက်လန့်ကာ ထွက်ပြေးခဲ့ရကြောင်း တောင်သူ ကိုအောင်သန်းဦးက ဧရာဝတီသို့ ပြောသည်။
“ဗိုလ်ချုပ်စိုးရှိန်က အခုထွက်၊ မထွက်ရင် သေနတ်နဲ့ ပစ်မယ်ဆိုပြီး သေနတ်နဲ့ လှမ်းချိန်တယ်။ ကျနော်နဲ့ အလုပ်သမား နှစ်ယောက်လည်း ကြောက်ပြီး ထွက်ပြေးလာတာ၊ ထမင်းထုပ်တောင် ကျန်ခဲ့တယ်” ဟု သူက ဆိုသည်။
ထိုဖြစ်စဉ်ကို သက်ဆိုင်ရာသို့ တင်ပြရန် ပေါက်မြိုင်အုပ်စု အင်တိုင်းသာရွာ အပိုင် ဧလာ ရဲစခန်းသို့ သွားရောက် အမှုဖွင့်ခဲ့ရာ လက်မခံဘဲ လယ်ဝေးမြို့နယ် တရားရုံးသို့ ဦးတိုက် လျှောက်ထားရန် ပြောဆိုသောကြောင့် လယ်ဝေးမြို့နယ် တရားရုံးသို့ သွားရောက်ခဲ့ကြောင်း၊ လယ်ဝေးမြို့နယ် တရားရုံးကလည်း လက်မခံဘဲ ရဲစခန်းသို့ သွားရောက် အမှုဖွင့်ရန် ပြောဆို သောကြောင့် မြို့နယ်ရဲစခန်းသို့ ပြန်သွားရာ စခန်းက အမှုဖွင့်ပေးရန် ငြင်းဆိုခဲ့ကြောင်း အမှုဖွင့်ရန် လိုက်ပါသွားခဲ့သူ
တောင်သူတဦးက ပြောသည်။

“ရဲစခန်းမှာ အမှုဖွင့်နိုင်ဖို့ နှစ်ရက်ကြိုးစားခဲ့တယ်။ အမှုက ဖွင့်လို့မရဘူး။ တရားရုံး သွားတော့လည်း လွှဲစာမပါလို့တဲ့ တရားစွဲလို့ မရဘူး။ နောက်တရက်ကျတော့ နေပြည်တော် ရဲချုပ်ရုံးတောင် ရောက်ခဲ့သေးတယ်။ ရဲချုပ်ရုံးကလည်း လယ်ဝေး ရဲစခန်းကိုပဲ ပြန်သွား ခိုင်းလိုက်ပြီး အမှုတော့ ဖွင့်မပေးလိုက်ဘူး” ဟု သူက ဆိုသည်။
ရဲစခန်းတွင် အမှုဖွင့်ရန် လက်မခံသောကြောင့် နေပြည်တော် ဇမ္ဗူသီရိမြို့နယ် ပြည်သူ့လွှတ်တော် ကိုယ်စားလှယ် ဒေါ်စန္ဒာမင်း ထံ တောင်သူများက သွားရောက် မေးမြန်းကြောင်း၊ ထို့ကြောင့် ဒေါ်စန္ဒာမင်းက ကိုယ်တိုင်စာရေးပေး၍ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်ထံ တိုင်ကြားရန် လမ်းညွှန်ပေးခဲ့ကြောင်း သိရသည်။
“ရဲစခန်းကို တိုင်တာ လက်မခံဘူးဆိုတော့ ဗိုလ်ချုပ်မှူးကြီး မင်းအောင်လှိုင်ဆီကို ဒီကိစ္စနဲ့ ပတ်သက်ပြီးအရေးယူပေးဖို့ တောင်သူတွေကို ကျမ စာတင်ခိုင်းလိုက်တယ်။ နှစ်ပတ်အတွင်းမှာ ဖြေရှင်း မပေးဘူးဆိုရင်တော့ ကျမအနေနဲ့ ဆက်ပြီးတော့ တတ်နိုင်တဲ့ ဘက်ကနေ ၀င်လုပ်ပေးမယ်” ဟု ဒေါ်စန္ဒာမင်းက ပြောသည်။
ဗိုလ်ချုပ်စိုးရှိန်က ၎င်းပိုင်ဆိုင်ရာ မြေအတွင်းတွင် ၀င်ရောက်စိုက်ပျိုးခြင်း မပြုလုပ်ရန် ရွာသားများကို အကြိမ်ကြိမ် သတိပေးခဲ့ပြီး ဖြစ်သည်ဟု Myanmar Times သို့ ဇူလိုင်လ ၁၁ ရက်နေ့က ပြောကြားထားသည်။ သေနတ်ဖြင့် ခြိမ်းခြောက်ခြင်း ပြုလုပ်ခဲ့သည်ဟုလည်း သူက အဆိုပါ မီဒီယာကို အတည်ပြု ပြောဆိုထားသည်။
“ဒီလို မလုပ်ဖို့ သူတို့ကို ကျနော် အမြဲ ပြောပါတယ်။ ဒီမြေကို ကျနော် တရားဝင် ပိုင်ဆိုင်တာပါ။ ဒါပေမယ့် သူတို့က ဆက်လုပ်နေတော့ ကျနော်တို့ဘက်က နည်းနည်းတော့ ခြိမ်းခြောက် ချင်လာပါတယ်” ဟု သူက Myanmar Times ကို ပြောသည်။
လယ်ဝေးမြို့နယ် ပေါက်မြိုင်အုပ်စု အင်တိုင်းသာရွာရှိ လယ်သမားများတို့ နှစ် ၂၀ ခန့် ဓားမဦးချ လုပ်ကိုင် စားသောက် လာခဲ့သော နေရာကို ဗိုလ်ချုပ်စိုးရှိန်၏ လူယုံများက ထိုနေရာသည် မြေကွက်အမှတ် ၁၀၅၊ ၁၀၆ အမည် ပေါက်ထားသည်ဟု ပြောဆိုကြောင်း၊ ထိုအကွက်များကို ဗိုလ်ချုပ်စိုးရှိန်၏ လူယုံများက ၀ယ်ယူမည်ဟု ဆိုကာ တိုင်များ လာစိုက်သောကြောင့် တောင်သူများက ၀ိုင်းဝန်း တားမြစ်ခဲ့ကြောင်း၊ ဗိုလ်ချုပ်စိုးရှိန်၏ တပည့်များထံမှ ငွေကြေးလုံးဝ လက်ခံထားခြင်း မရှိကြောင်း၊ တားမြစ်ပြီး နောက်ရက်တွင် ဗိုလ်ချုပ်စိုးရှိန်နှင့် လူအင်အား ၃၀ ခန့် ရောက်ရှိလာကြောင်း တောင်သူ ကိုအောင်သန်းဦးက ရှင်းပြသည်။
“၀ယ်ဖို့ဆိုပြီး သူတို့က ကျနော်တို့ကို ရက်ချိန်းတွေဘာတွေ ပေးပြီးပြီ။ ၆ လ ပိုင်းကတည်းကပဲ။ ကျနော့် အကွက်ကို တစ်ဧက တစ်သိန်းခွဲ ပေးမယ်၊ ဘေးက အကွက်ကိုတော့ တဧက သုံးသိန်းပေးမယ်လို့ ပြောတယ်။ ပြီးရင် ဗိုလ်ချုပ်လာရင် ခင်ဗျားတို့ ရသလောက် တောင်းယူလို့ ပြောတယ်။ ချိန်းတဲ့ရက်ကို သူတို့က ရောက်မလာဘူး။ နောက်ပိုင်း မ၀ယ်တော့ဘဲနဲ့ ဆီးပင်တွေ ၀င်စိုက်သွားတယ်” ဟု သူက ဆိုသည်။
တောင်သူများအနေဖြင့် လက်ရှိမြေကို ဓားမဦးချ လုပ်ကိုင်သည်ဟုသာ ပြောနိုင်ပြီး ပိုင်ဆိုင်ကြောင်း ပြစရာ အထောက် အထားမရှိဟု သိရသည်။
လက်ရှိအချိန်၌ ယင်းမြေပေါ်တွင် နှမ်း ၇ ဧက စိုက်ပျိုးထားပြီး ကြံစိုက်ပျိုးရန် ပြင်ဆင်ထားကြောင်း၊ တခြား အကွက် များတွင်လည်း သီဟိုဠ်၊ ငှက်ပျော စသည့်အပင်များ စိုက်ပျိုးထားကြောင်း တောင်သူများက ပြောသည်။

တောင်သူများကို သေနတ်ဖြင့် ထုတ်ချိန်ခဲ့သူ ဗိုလ်ချုပ်စိုးရှိန်သည် ယခင် နိုင်ငံတော်အကြီးအကဲ ဗိုလ်ချုပ်မှူးကြီးဟောင်း ဦးသန်းရွှေ အနားယူသွားသည် အထိ ကိုယ်ရေး အရာရှိအဖြစ် တာဝန်ယူပေးခဲ့ရသူ ဖြစ်ပြီး လက်ရှိအချိန်တွင် ကာကွယ်ရေး ၀န်ကြီးဌာနတွင် ဗိုလ်ချုပ် ရာထူးဖြင့် တာဝန်ထမ်းဆောင် နေသူ ဖြစ်သည်။

No comments:

နောက်ဆုံးတင်ပြီသမျှ..ဆက်ဖတ်ရန်...အောက်သို့