မြတ်စွာဘုရားရှင်ရဲ့ တရားလေးတစ်ခုရှိပါတယ်။ အဲဒါဘာလဲလို့ဆိုတော့ (ကိစ္ဆံမဇ္ဇာနဇီဝိတံ) သတ္တဝါတွေ အသက်ရှည်ရှည်နေရဖို့ခဲယဉ်ခြင်းဆိုတဲ့စကားလေးတစ်ခုပါ။မှန်ပါတယ်။လူ့လောကထဲကိုရောက်လာတဲ့ သတ္တဝါတွေ အသက်ရှည်ရှည်နေရဖို့ တကယ်ပင်ခဲယဉ်းလှပါတယ်။ဘာကြောင့်လဲဆိုတော့ တစ်ချို့ဆိုရင် လူလို့ပင်မမည်သေးချိန်မှာသေဆုံးသွားတာမျိုး၊၊အမိဝမ်းတွင်းက ထွက်လာတာနဲ့သေဆုံးသွားမျိုး၊အသက်တန်းအားဖြင့် ၁၀နှစ်၊၂၀နှစ် စသည်ဖြင့်ပေါ့လေ ငယ်ငယ်ရွယ်ရွယ်လေးမှာတင်သေဆုံးသွားတဲ့လူများ အားလုံးမြင်ဖူးကြ တွေ့ကြမှာပါ။အဲဒီအချက်ိုထောက်ဆကြည့်ရင် သတ္တဝါတွေ အသက်ရှည်ရှည်နေရဖို့အမှန်ပင်ခဲယဉ်းလှကြောင်း သိသာလှပါတယ်။
အသက်ရှည်စွာနေရတဲ့သူများလည်း တန်ဘိုးရှိတဲ့ အသက်ရှည်ခြင်းနှင့် တန်ဘိုးမဲ့တဲ့အသက်ရှည်ခြင်းမျိုးလည်းရှိနေပြန်ပါတယ်။ဒါပြင် အသက်ရှည်ဖို့၊နဲ့ ကိုယ်ကျင့်တရားကောင်းဖို့ ဘယ်က ပဓာနကျသလဲလို့စီစစ်ဖို့လဲလိုလာပြန်တယ်။၊အသက်တွေရာထောင်ရှည်ချင်တိုင်း ရှည်ပါစေ၊ကိုယ်ကျင့်တရားမရှိဘဲနဲ့ ဒီလူ အသက်ရှည်နေရင်ဘာများတန်ဘိုးရှိသလဲ။ကိုယ်ကျင့်သီလမရှိဘူး။ ကိုယ်နဲ့နှုတ်ကိုဘာနဲ့မျှမထိန်းဘူး၊မိမိရဲ့ကိုယ်နဲ့နှုတ်ကိုဘာမှမထိန်းဘူး။ မိမိရဲ့ကိုယ်နှုတ်နှစ်ပါး မထိန်းဘဲနဲ့သီလတရား ကင်းပြီးတော့နေတဲ့လူတစ်ယောက်ဟာ ကိုယ်နဲ့နှုတ်ကိုထိန်းမယ်ဆိုတဲ့ စေတနာသီလကင်းပါလိမ့်မယ်။ကိုယ်နဲ့နှုတ်ကို မလွန်းကျူးခြင်းဆိုတဲ့ဝီရတီသီလ ကင်းဦးမှာပါ။နောက် ကိုယ်နဲ့နှုတ်ကိုစောင့်မယ်ဆိုတဲ့ သတိတရားကင်းလို့ သံဝရသီလကင်းပါလိမ့်မယ်။
စည်းလွတ်ဝါးလွတ် အသက်ရှင်နေတဲ့ပုဂ္ဂိုလ်၊ကိုယ်ကျင့်တရားကင်းမဲ့ပြီး အသက်ရှင်နေတဲ့ပုဂ္ဂိုလ်၊အဲဒီပုဂ္ဂိုလ်တွေဟာ နှစ်ပေါင်းတစ်ရာကြာကြာ အသက်ရှင်နေပါသော်လဲ ဘာများဖြစ်လာတုံးလို့ဆိုတော့
(၁)။မကောင်းသတင်းထွက်ပြီး အသက်ရှင်ရမယ်။
(၂)။မေ့လျော့ပေါ့ဆတဲ့တရားတွေ လွှမ်းပြီးတော့ တိုးတက်မှုတွေ အကုန်လုံးပျက်စီးရတတ်ပါတယ်။လူလောကအနေနဲ့ကြည့်ရင် သုရာမေရယရယ်၊ကာမေသုမိစ္ဆာစာရတစ်ခုရယ်၊အဲဒီနှစ်ခုလောက်ကို လွန်လွန်ကျူးကျူး လိုက်စားမိရင် ဒီလူရဲ့ဘဝဟာ တက်လမ်းမရှိတော့ဘူးဆိုတာသေချာပါတယ်။သုရာမေရယမူးယစ်သောက်စားတဲ့အမှုတွေကို၊အလွန်အကျူးလိုက်စား၊ ကာမေသုမိစ္ဆာစာရ အမှုတွေလိုက်စား၊အဲဒီ(၂)ခုလောက်လွန်ကျူးမိတာနဲ့ ဒီလူရဲ့ တက်လမ်းတွေ အကုန်လုံးဆုတ်ယုတ်သွားမှာပါ။အဒိန္တွာဒါနအမှုကို စွက်လိုက်ဦးမယ်ဆိုရင်တော့ နာလန်ထူဖို့မလွယ်တော့ပါဘူး။ကိုယ်ကျင့်တရားကင်းမဲ့တာ၊ကိုယ်ကျင့်တရားပျက်တာဟာ မိမိဘဝရဲ့တိုးတက်ရေး၊ကြီးပွားရေး၊စီးပွားရေးတွေကို မေ့ကုန်တယ်ဆိုတဲ့ မေ့လျော့ပေါ့ဆခြင်းကြောင့် ကြီးစွားသော စီးပွားရေး၊ကြီးပွားရေးတိုရဲ့ ဆုံးရှုံးပျက်ပြားခြင်းကိုရောက်စေပါတယ်။
(၃)။ကိုယ်ကျင့်တရားပျက်နေတဲ့သူတစ်ယောက်ဟာ ဘယ်ပရိတ်သတ်ထဲကိုပဲဝင်ဝင် မိမိကိုယ်မိမိမလုံခြုံဘူး၊လိပ်ပြာမသန့်ဘူးလို့ပြောရမှာပါ။အဲဒီလိုအားနည်းချက်တွေကြောင့် ပရိတ်သတ်ထဲကိုရောက်ပြီဆိုတာနဲ့ မျက်နှာငယ်ရပါတယ်။ရွံ့တီးရွံ့တွံ့ဖြစ်တတ်ပါတယ်။
(၄)။ကိုယ်ကျင့်တရားပျက်နေတဲ့ပုဂ္ဂိုလ်ဟာ သေခါနီးအခါကျရင်လည်းတွေတွေဝေဝေ၊ညည်းညည်းညူညူ အော်အော်ဟစ်ဟစ်နဲ့ ကယ်ပါ၊ယူပါတစာစာဖြစ်ပြီးသေရတတ်ပါတယ်။
(၅)။သေခါနီးထိုသို့ညည်းညူပြီးသေရတဲ့ပုဂ္ဂိုလ်ဟာ သေလွန်သွားတဲ့အခါကောင်းရာဘုံကိုမရောက်တော့ပဲ မကောင်းတဲ့ဘုံကိုသာ မုချရောက်မှာဖြစ်ပါတယ်။ထို(၅)ချက်ကိုကြည့်လိုက်ရင် ကိုယ်ကျင့်တရားပျက်ပြီး အသက်ရှည်နေခြင်းသည် တန်ဘိုးမဲ့သော အပြစ်မကင်းသော ဆိုးကျိုးများကိုသာရစေတတ်တာဖြစ်လို့ ထိုအသက်ရှည်ခြင်းမျိုးသည် မမြတ်တဲ့အသက်ရှည်ခြင်းမျိုး၊တန်ဘိုးမဲ့တဲ့အသက်ရှည်ခြင်းမျိုးသာဖြစ်ပါတယ်။
ကိုယ်ကျင့်တရားနဲ့ပြည့်စုံပြီးအသက်ရှင်နေတဲ့ပုဂ္ဂိုလ်ကျတော့ တစ်မနက်ပဲ အသက်ရှည်ပါစေ အလွန်တန်ဘိုးရှိပါတယ်။ဘာလို့လဲလို့ဆိုတော့ ကိုယ်နဲ့နှုတ်ကိုထိန်းပြီးတော့နေလို့ပါ။ဆိုလိုတာက ကိုယ်နဲ့နှုတ်ကိုထိန်းတာဟာ သီလဖြစ်ပါတယ်။ကိုယ်နဲ့လည်းမကောင်းမှုကိုမလုပ်ဘူးထိန်းတယ်။နှုတ်နဲ့လည်းမကောင်းမှုကိုမပြောဘူးထိန်းတယ်။ အဲလိုထိန်းနေတဲ့အတွက်ကြောင့်ကိုယ်နဲ့နှုတ်ကို ထိန်းမယ်ဆိုတဲ့စေတနာသီလ၊ကိုယ်နဲ့နှုတ်နဲ့မကောင်းမှုကိုမလွန်ကျူးခြင်း ဆိုတဲ့ဝိရတီသီလ၊ကိုယ်နဲ့နှုတ်နှစ်ပါးအပေါ်အမြဲတန်းသတိထားနိုင်တဲ့အတွက် သတိ(သံဝရသီလ)။ဒီသုံးချက်ပြည့်စုံနေတော့ အကုသိုလ်တွေကင်းနေတဲ့အတွက်ကြောင့် တန်ဘိုးရှိတဲ့ အသက်ရှင်ခြင်းမျိုးဖြစ်ပါတယ်။သီလပြည့်စုံနေရင် စေတနာရယ်၊ဝိရတီရယ်၊သတိရယ်ဒီသုံးပါးလုံးရပြီးနေတဲ့အတွက် တန်ဘိုးရှိတဲ့အသက်ရှည်ခြင်းမျိုးဖြစ်ပါတယ်။ဒါကြောင့်အားလုံးသော ပုဂ္ဂိုလ်များလည်း တန်ဘိုးရှိတဲ့အသက်ရှည်ခြင်းမျိုးဖြစ်အောင်ကြိုးစားကြဖို့တိုက်တွန်းလိုက်ရပါသည်။
ကိုးကား။ ။သီတဂူဆရာတော်ဘုရားကြီး၏ အသက်ရှည်ခြင်းဆောင်းပါးကိုမှီငြမ်းရေးသားလိုက်ပါသည်။
အားလုံးကိုယ်စိတ်နှစ်ပါးကျန်းမာချမ်းသာကြပါစေ။
အရှင်ဝိမလဝံသ(နာလန္ဒာတက္ကသိုလ်၊အိန္ဒိယနိုင်ငံ)
No comments:
Post a Comment