မြန်မာနိုင်ငံလုံးဆိုင်ရာမော်လ၀ီအအဖွဲ့ဝင်များက ရခိုင်ပြည်နယ်တောင်ကုတ်မြို့နယ်တွင် ဂျမာအတ်လုပ်ငန်း လုပ်ကိုင်သူ(၁၀)ဦး
အသတ်ခံခြင်းနှင့်ပတ်သက်၍ အမှန်တရား ပေါ်ထွက်စေရန် ဇွန်လ(၆)ရက်နေ့နေ့လည်ပိုင်းက အမျိုးသားဒီမိုကရေစီအဖွဲ့ချုပ် ဥက္ကဋ္ဌ
ဒေါ်အောင်ဆန်းစုကြည်ထံသို့ လာရောက်တွေ့ဆုံခဲ့ကြောင်း သိရှိရသည်။
မြန်မာနိုင်ငံလုံးဆိုင်ရာ မော်လ၀ီများအဖွဲ့ချုပ်မှ အဖွဲ့ဝင်သည်စာနယ်ဇင်းများတွင် မွတ်ဆလင်(ကုလား)ဆိုသည့် စကားလုံး အသုံးအနှုန်းများမသုံးစွဲရန်နှင့် ရခိုင်ပြည်နယ်တွင် အသတ်ခံခဲ့ရသော ဘာသာရေးလုပ်ကိုင်သူအစ္စလာမ်ဘာသာဝင် (၁၀)ဦး သေဆုံးခဲ့ရခြင်းများကို အရေးယူဖြေရှင်းပေးရန်ဒေါ်အောင်ဆန်းစုကြည်နှင့် လာရောက် တွေ့ဆုံခြင်းဖြစ်သည်။
“ ဘာသာရေးလုပ်ဖို့သွားတဲ့လူတွေ၊ အသတ်ခံရတဲ့သူတွေကိုမွတ်ဆလင်(ကုလား)လို့ရေးတယ်၊ အမှန်တော့ ကျွန်တော်တို့က
အစ္စလာမ်ဘာသာဝင်တွေပါ။ မွတ်ဆလင်လူမျိုးပါ နောက်တစ်ခုက ဒီလူဟာနိုင်ငံတော်ရဲ့ ဥပဒေကို ဖောက်ဖျက်တဲ့အတွက်ကြောင့်ဆိုရင် ဥပဒေအတိုင်းဆုံးဖြတ်လိုက် လက်ခံတယ်၊ ကြိုက်သလို ဆုံးမ လိုက် အခုတော့ ဘုရားဖူးသွားတဲ့အစ္စလာမ်လူမျိုး ဘာသာရေး သမားတွေကို ရက်ရက်စက်စက် သတ်ပစ် တာမြင်ရတာကျွန်တော်တို့အတွက် မတရားဘူး” ဟု မော်လ၀ီများအဖွဲ့ချုပ် အဖွဲ့ဝင်
ဦးဆန်းကိုကိုက ပြောသည်။
အမျိုးသားဒီမိုကရေစီအဖွဲ့ချုပ်ခေါင်းဆောင် ဒေါ်အောင်ဆန်းစုကြည်က မိမိသည်အစိုးရမဟုတ်သောကြောင့် ရခိုင်ပြည်နယ် တောင်ကုတ်မြို့နယ်တွင် အသတ်ခံခဲ့ရသော အစ္စလာမ်ဘာသာဝင်များအတွက် အရေးယူ ဆောင်ရွက်ပေးနိုင်ခြင်းမရှိသော်လည်း နိုင်ငံလုံခြုံရေးအတွက် လူမျိုးဘာသာမရွေး ကြိုးစားဆောင်ရွက်သွားမည်ဖြစ်ကြောင်း မြန်မာနိုင်ငံလုံးဆိုင်ရာ မော်လ၀ီများအဖွဲ့ချုပ်
အဖွဲ့ဝင်များသို့ ပြောကြားခဲ့သည်။
“အရေးယူဖို့ဆိုတာကလဲ ပွင့်ပွင့်လင်းလင်းပြောရရင် အမေက အစိုးရမဟုတ်ဘူးဒါပေမဲ့ အမေအနေနဲ့ တက်နိုင်သမျှ ဒီနိုင်ငံက အားလုံးအတွက်အားလုံးလုံခြုံဖို့အတွက် ကြိုးစားသွားမယ်။ မတည်နိုင်တဲ့ကတိကိုမပေးနိုင်ဘူး။ အမေအနေနဲ့ကလဲ ဘယ်လိုလူမျိုးဆိုပြီး မခွဲခြားဘဲနဲ့ကာကွယ်ပေးသွားဖို့ ရှိပါတယ်။ သားတို့ စိတ်အေးအေးထား၊ ဒေါသနဲ့တုန့်ပြန်မှုကပြသာနာအကြီးကြီး ဖြစ်သွားမယ်။ “ဟု အန်အယ်လ်ဒီပါတီ ဥက္ကဋ္ဌဒေါ်အောင်ဆန်းစုကြည်က ပြောကြားခဲ့သည်။
ရခိုင်ပြည်နယ် တောင်ကုတ်မြို့တွင် အစ္စလာမ်ဘာသာဝင်များ အသတ်ခံရမှုပြသာနာကြီးထွားလာခြင်းသည် တရားဥပဒေစိုးမိုးရေးမရှိခြင်းကြောင့်နှင့်လှုံ့ဆော်သူရှိနေခြင်းကြောင့် ဖြစ်နိုင်ကြောင်း ဒေါ်အောင်ဆန်းစုကြည် က
သုံးသပ်ပြောဆိုသည်။
“နံပတ်တစ်က ဥပဒေစိုးမိုးရေး ၊ နံပတ်နှစ်က လှုံ့ဆော်တဲ့လူများရှိသလားဆိုတဲ့ အတွေးပေါ့။ ဒီနိုင်ငံမှာဥပဒေစိုးမိုးရေးရှိတယ်ဆိုရင် ပထမဦးဆုံး ပြသာနာတစ်ခုဖြစ်ပြီဟေ့ဆိုရင်ရာဇ၀တ်မှုတစ်ခုဖြစ်ပြီဆိုကတည်းက အရေးယူလိုက်မယ်ဆိုရင် ဒီပြသာနာတွေဟာ
ကြီးပွားသွားမယ်လို့ မထင်ဘူး။ ဥပဒေပိုင်းဆိုင်ရာတွေက ဖြေရှင်းရမယ့်ပြသာနာ၊ အမြန်ဆုံးဖမ်းရမှာ ၊ အရေးယူရမှာ ရဲတပ်ဖွဲ့နဲ့ဆိုင်တာပေါ့နော်အဲ့ဒါတွေကို မြန်မြန် ဆန်ဆန် မလုပ်နိုင်တော့ ပြသာနာတွေကတစ်ဆင့်ပြီးတစ်ဆင့် ကြီးလာတယ်။ နောက်တစ်ခုက အခြေအနေ တစ်ခုကိုလှုံ့ဆော်နေတဲ့လူ ရှိသလားဆိုတာ အခြေအမြစ်ရှိရင် ထပြီးတော့
အော်ချင်နေတဲ့လူက ရှိတယ်။ ဒီလိုအော်ခြင်းက ကျွန်မတို့နိုင်ငံအတွက်ကျွန်မတို့တိုင်းပြည်အတွက် အကျိုးရှိသလား မရှိဘူးလားဆိုတာ
မဆင်ခြင်ဘဲနဲ့ အော်နေမယ်ဆိုရင် အဲ့ဒါကလဲ မလိုလားအပ်သလို ပြသာာနာကြီးထွားလာ နိုင်တယ်” ဟု ဒေါ်အောင်ဆန်းစုကြည်က ဇွန်(၆)ရက်သတင်းစာရှင်းလင်းပွဲတွင် ပြောကြားခဲ့သည်။
အမျိုးသားဒီမို ကရေစီအဖွဲ့ချုပ်ခေါင်းဆောင် ဒေါ်အောင်ဆန်းစုကြည်၏ပြောကြားချက်နှင့်ပတ်သက်ပြီး စိတ်တစ်ဝက် ပေါ့ပါးသွားကာ ရှေ့ဆက်၍အမှန်တရားပေါ်ပေါက်ရန်အတွက် မျှော်လင့်နေမည် ဖြစ်ကြောင်းလာရောက်တိုင်ကြားသူ မြန်မာနိုင်ငံလုံးဆိုင်ရာမော်လီများအဖွဲ့ချုပ်အဖွဲ့ဝင်များက ဆိုသည်။
“ကျွန်တော်တို့အနေနဲ့က ရှေ့ဆက်ပြီး ဘာဖြစ်လာမလဲဆိုတာကိုမျှော်လင့်ရုံပဲရှိတယ်။ အမေပြောသလိုပဲ ငြိမ်းငြိမ်းချမ်းချမ်းနဲ့
ပြီးသွားမှာကိုပဲ မျှော်လင့်ပါတယ်။ ဒေါ်အောင်ဆန်းစုကြည်နဲ့တွေ့ပြီးသွားတော့ စိတ်တစ် ၀က်ကတော့ ပေါ့ပါးသွားတယ် ။ နောက်တစ်ဝက်ကတော့ရှေ့မှာလာမယ့်အရာတွေကို ကြည့်ပြီးတော့ မျှော်လင့် ရမှာပေ့ါ” ဟုမြန်မာနိုင်ငံလုံးဆိုင်ရာ မော်လီများအဖွဲ့ချုပ်အဖွဲ့ဝင် ဦးလင်းကိုကိုကပြောသည်။
မြန်မာနိုင်ငံလုံးဆိုင်ရာ မော်လ၀ီများအဖွဲ့ချုပ်အဖွဲ့ဝင်များသည်မြန်မာနိုင်ငံအစ္စလာမ်သာသနာရေး အဖွဲ့(၅)ဖွဲ့ ကိုယ်စား
အမျိုးသားဒီမိုကရေစီအဖွဲ့ချုပ် ခေါင်းဆောင် ဒေါ်အောင်ဆန်းစုကြည်နှင့်တွေ့ဆုံခြင်း ဖြစ်သည်။
No comments:
Post a Comment