နတလ စံပြကျေးရွာ တခုမှ စာသင်ကျောင်း (ဓာတ်ပုံ – ငြိမ်းချမ်း / ဧရာဝတီ)
လတ်တလောတွင် နေအိမ်များ ရရှိသော်လည်း လုပ်ကိုင်စားသောက်ရန် လယ်မြေများ မရရှိသေးသောကြောင့် ကျဘမ်းအလုပ်များ လုပ်ကိုင်နေရကြောင်း၊ ရခိုင်ပြည်နယ် အစိုးရ၊ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) နှင့် လူမှုရေးအဖွဲ့များ၏ ကူညီပံ့ပိုးမှုများကို အားကိုးနေရကြောင်း ဘင်္ဂလားဒေ့ရ်ှမှ မောင်တောမြို့နယ် လောင်းဒုံကျေးရွာသို့ ပြောင်းရွှေ့လာသည့် ဒုက္ခသည် တဦးဖြစ်သူ ဦးသိန်းဇော်က ပြောသည်။
“ကျနော်တို့မှာ လောလောဆယ် လုပ်စားမယ့်လယ်တွေ မရသေးတော့ ရရာအလုပ်ကိုပဲ လုပ်ကိုင်စားသောက်နေရတယ်။ နေအိမ်ကတော့ အရင်အဟောင်းအိမ်ကို ပေးထားတယ်။ စားဝတ်နေရေးအတွက် အစိုးရက ပထမ ကျပ် ၅ သောင်း ကူညီတယ်။ နောက်ပြီး UNHCR ကလည်း နည်းနည်း ကူညီတာရှိပေမယ့် အခုတော့ မရတော့ဘူး။ တခါတလေ လူမှုအဖွဲ့တချို့က လာကူညီတာတွေရှိတယ်” ဟု ဦးသိန်းဇော်က ဆိုသည်။
ဘင်္ဂလာဒေ့ရ်ှနိုင်ငံအတွင်းမှ ရခိုင်နှင့် ရခိုင်မျိုးနွယ်စုဝင် သက်၊ ဒိုင်းနက်၊ မာရမာ စသည့် လူမျိုးများသည် ဘင်္ဂလားဒေ့ရှ် နိုင်ငံရေး အားပြိုင်မှုများကြောင့် ဒေသတွင်း လုံခြုံရေးကို စိတ်မချခြင်း၊ အလုပ်အကိုင် ရှားပါးပြီး စားဝတ်နေရေး အခက်အခဲ ရှိခြင်းတို့ကြောင့် ပြီးခဲ့သည့် နှစ်ကုန်ပိုင်းမှ စတင်ကာ ရခိုင်ပြည်နယ်သို့ ပြောင်းရွှေ့လာကြရာ ရခိုင်ပြည်နယ် အစိုးရက ဒုက္ခသည်အဖြစ် အသိအမှတ်ပြု လက်ခံထားခြင်း ဖြစ်သည်။
ယခုအခါ ပြောင်းရွှေ့အခြေချသူ မိသားစု ၃၀၀ ကျော်ရှိပြီး မောင်တော မြို့ပေါ်ရှိ ဗဟိုကျောင်း၊ မောင်တော နယ်ဘက်ရှိ ခရေမြိုင်၊ အောင်သာယာ၊ လောင်းဒုံ၊ တောင်ပြို စသည့် နယ်စပ်ဒေသ တိုင်းရင်းသား လူမျိုးများရွာ (နတလ) များနှင့် ကျောက်တော် မြို့များဘက်တွင် ရောက်ရှိနေကြကြောင်း သိရသည်။
ရခိုင်ပြည်နယ်အတွင်းသို့ ၀င်ရောက်ခိုလှုံလာသော ရခိုင်တိုင်းရင်းသားများနှင့် ရခိုင်မျိုးနွယ်စုများ၏ လုံခြုံရေး၊ စားဝတ်နေရေး စသည့်တို့ကို ရခိုင်ပြည်နယ် အစိုးရအဖွဲ့က ဆောင်ရွက်ပေးနေကြောင်း ရခိုင်ပြည်နယ် အစိုးရ၏ ပြန်ကြားရေးအဖွဲ့ တာဝန်ခံ ဦးဝင်းမြိုင်က ဧရာဝတီကို ပြောသည်။
စားနပ်ရိက္ခာ အခက်အခဲဖြစ်နေသူများသည် ပလက်ဝ ဒေသမှ ကျောက်တော် ဒေသသို့ ၀င်ရောက်လာသူများ ဖြစ်ကြောင်း၊ ၎င်းတို့ကို လူဦးရေစာရင်း ကောက်ခံနေဆဲ ဖြစ်၍ အထောက်အပံ့ရိက္ခာ မပို့ဆောင်နိုင်သေးကြောင်း ဦးဝင်းမြိုင်က ဆိုသည်။
မောင်တောဒေသသို့ ၀င်ရောက် ခိုလှုံနေသူများအတွက် စားဝတ်နေရေး ကိစ္စများကိုမူ ပြည်နယ်အစိုးရက ကူညီဆောင်ရွက် ပေးထားပြီး ဖြစ်ကြောင်း၊ ကျောက်တော်ဒေသသို့ ရောက်လာ သူများ အတွက်လည်း နေအိမ်များ ဆောက်လုပ်ပေးရန် မြေနေရာ ရှာဖွေနေဆဲဟု ဦးဝင်းမြိုင်က ဆက်လက် ပြောသည်။
မေလ ၂၆ ရက်နေ့တွင် စစ်တွေမြို့ အခြေစိုက် ဝံလက်ဖောင်ဒေးရှင်းက ဗဟိုကျောင်း၊ ခရေမြိုင်၊ အောင်သာယာ၊ လောင်းဒုံ ကျေးရွာများရှိ မိသားစု ၂၀၀ ကျော်၊ ဒုက္ခသည် ၁၀၄၆ ဦးအား ငွေကျပ် သိန်း ၁၀၀ ကျော်နှင့် အဝတ်အစား စသည်တို့ကို သွားရောက်လှူဒါန်းကြောင်း သိရသည်။
“သူတို့ကို လူသားချင်း စာနာထောက်ထားတဲ့ အနေနဲ့ သွားရောက် လှူဒါန်းတာ ဖြစ်ပါတယ်။ ဒီလှူဒါန်းတဲ့ ငွေတွေဟာ ကျနော်တို့ အဖွဲ့ဝင်တွေ စစ်တွေမှာ လိုက်ပြီး အလှူခံထားတာရယ်၊ အနယ်နယ်အရပ်ရပ်က လှူဒါန်းတဲ့ အလှူရှင်တွေဆီက ငွေနဲ့ သွားရောက် လှူဒါန်းတာ ဖြစ်ပါတယ်” ဟု ဝံလက်ဖောင်ဒေးရှင်း၏ ဒါရိုက်တာဖြစ်သူ ကိုခိုင်ကောင်းစံက ပြောသည်။
ဘင်္ဂလားဒေ့ရ်ှမှ ပြောင်းရွှေ့လာသူ တချို့သည် ကြိုတင် အကြောင်းကြားခြင်း မရှိသောကြောင့် ပြင်ဆင်ချိန်မရဘဲ ဘုန်းကြီးကျောင်းတွင် လောလောဆယ် တာဝန်ယူ ကျွေးမွေးထားရကြောင်း အနောက်တံခါး လူမှုကူညီရေးအဖွဲ့မှ ဆရာတော် ဦးစရဏက မိန့်သည်။
“အစိုးရကလည်း သူတို့ကို ထုတ်ပေးမယ့် လယ်တွေကို အပြစ်အနာအဆာ ကင်းရှင်းအောင် စိစစ်ပြီးမှ ပေးမှာဖြစ်လို့ လယ်ပေးဖို့အတွက်တော့ နည်းနည်း နောက်ကျဦးမယ် ထင်တယ်။ ဒါပေမယ့် တတ်နိုင်သလောက် အကူညီတွေကိုတော့ ပေးနေပါတယ်” ဟု ဆရာတော်က မိန့်သည်။
No comments:
Post a Comment