မြန်မာငြိမ်းချမ်းရေး ဖေါ်ဆောင်ရေး ကော်မီတီနဲ့ အပစ်အခတ်ရပ်စဲရေး သဘောတူ လက်မှတ်ရေးထိုးထားတဲ့ မွန်လက် နက်ကိုင်တပ်ဖွဲ့ဖြစ်တဲ့ မွန်ပြည်သစ်ပါတီနဲ့ မြန်မာစစ်တပ်တို့အကြားမှာ တနင်္သာရီတိုင်း ဒေသကြီး ဘိတ်ခရိုင်ဘက် မှာ မနေ့ကပထမဆုံး အကြိမ်တိုက်ပွဲ ဖြစ်ပွါးခဲ့ပါတယ်။ ထိုင်းမြန်မာ နယ်စပ်နဲ့သုံးမိုင်အကွာ မွန်ပြည်သစ်ပါတီ တပ်စခမ်းချရာ ဘိတ်ခရိုင် ထိလိလုံနယ် ပေါင်းကိုးဒေသကို မြန်မာလှုပ်ရှား တပ်တွေကနေ ၀င်ရောက်တိုက်ခိုက်ခဲ့ တယ်လို့ မွန်ပြည်သစ်ပါတီ ဘိတ်ခရိုင်ဒေသ တပ်မှူးဖြစ်သူ ဗိုလ်မှူးတမော့ချမ်းကပြောပါတယ်။
"အင်္ဂလိပ်(၁၆)ရက်နေ့မှာတိုက်ပွဲဖြစ်တယ်။ ကော့သောင်းတပ်(၅၈၁) ဗိုလ်ကြီးနေမျိုး အဲဒီမှာလူ(၂၁)ယောက်လား အဲဒီလောက်ရှိတယ်အင်အား။ အဲတာတက်လာတယ်။ နယ်စပ်ကိုကျွန်တော်တို့လုံခြုံရေးချထားတဲ့ဟာကို စစ်တပ်တွေတက်လာတယ်။ အဲတာတိုက်ပွဲဖြစ်တယ်။ ကျွန်တော်တို့ဘက်မှာလူ(၂)ယောက်ကျဆုံးသွားတယ်။ ကာဘိုင်နှစ်လက်နဲ့သူရသွားတယ်။ ပြီးတော့သူတို့ဘက်မှာ လူတယောက်ဆုံးသွားတယ်။ ပြီးတော့ဒဏ်ရာ (၄)ယောက်ထိခိုက်သွားတယ်အဲဒီမှာ။"
မွန်ပြည်သစ်ပါတီနဲ့မြန်မာအစိုးရတို့ဟာ ၁၉၉၅ခုနှစ်ဇွန်လမှာ အပစ်အခတ်ရပ်စဲရေးလက်မှတ်ရေးထိုးပြီးကတည်းက တိုက်ပွဲဖြစ်ပွါးမှုရပ်ဆိုင်းခဲ့ရာကနေ အခုအခါပထမဆုံးအကြိမ်တိုက်ပွဲဖြစ်ပွါးခဲ့တာပါ။
မွန်ပြည်သစ်ပါတီအနေနဲ့ ဘိတ်ခရိုင်ဒေသမှာလှုပ်ရှားရာမှာ နယ်မြေခံမြန်မာတပ်ဖွဲ့တွေနဲ့ ဆွေးနွေးညှိနှိုင်းမှုတွေ လုပ်ဆောင်ခဲ့သလို အရင်ကစစ်ရေးပဋိပက္ခဖြစ်ပွါးမှုမရှိခဲ့ဘူးလို့လဲ ဘိတ်ခရိုင်ဒေသတပ်မှူးဖြစ်သူ ဗိုလ်မှူးတမော့ ချမ်းက ပြောပါတယ်။
ပဋိပက္ခတွေတခါမှမဖြစ်ဘူးဘူး။ ဒီမှာကျွန်တော်တို့လှုပ်ရှားနေတာ သတင်းပေးထားတယ်။ ဒီမှာမဏ္ဍိုင်ဘက်မှာ ကျွန်တော်တို့လှုပ်ရှားနေတာ ဒီမှာရှိတဲ့စစ်တပ်တွေအားလုံးဆွေးနွေးထားတာရှိတယ်။ အဲဒီလှုပ်ရှားတပ်ဖွဲ့ဘဲ ကျွန်တော်တို့တခါမှမတွေ့ဘူးဘူး။ သူတို့လှုပ်ရှားနေတာ။ သတင်းလဲမပေါ်ဘူးသူတို့လာတာ။
ပေါင်းကိုးဒေသမှာ မွန်ပြည်သစ်ပါတီကနေ ဒေသဖွံ့ဖြိုးမှုအတွက်လုပ်ဆောင်နေတာဖြစ်ပြီး ဒီအချက်အပေါ် မြန်မာ စစ်တပ်ကနေကျေနပ်မှုမရှိလို့ အခုလိုတိုက်ခိုက်တယ်လို့ယူဆရကြောင်းဗိုလ်မှူးတမော့ချမ်းကပြောပါတယ်။
ဒီတိုက်ပွဲမဖြစ်ပွါးခင် ပြီးခဲ့တဲ့ဇူလိုင်လ(၁၀)ရက်နေ့တုန်းကလဲ မြန်မာစစ်တပ်ကနေ မွန်ပြည်သစ်တပ်ဖွဲ့ဝင်တဦးကို ဖမ်းဆီးသွားခဲ့တယ်လို့လဲ ဒေသခံရွာသားတဦးဖြစ်သူ နိုင်လဂွန်းက မွန်ဘာသာနဲ့အခုလိုပြောပါတယ်။
တပ်ရင်း(၅၈၁)က ဗိုလ်ကြီးနေမျိုးဦးဆောင်ပြီးတော့တက်လာတယ်။ သူတို့ကနေ မွန်ပြည်သစ်ပါတီက တပ်သားတဦးကိုဖမ်းသွားတယ်။ ဒီရဲဘော်ကတော့ ရွာသစ်ဘက်ကိုသူ့ဇနီးကိုလိုက်အပို့မှာအဖမ်းခံရတယ်။ ဖမ်ဖမှာသူတို့ဖမ်းလိုက်တယ်။ ဇူလိုင်လ(၁၀)ရက်နေ့ကဖမ်းထားတာအခုအထိပြန်မလွှတ်သေးဘူး။ သတင်းလဲ ဘယ်မှာမှမပေါ်သေးဘူး။
မွန်ပြည်သစ်ပါတီဟာ ၁၉၉၅ခုနှစ်ဇွန်လမှာ မြန်မာစစ်အစိုးရနဲ့အပစ်အခတ်ရပ်စဲရေးသဘောတူလက်မှတ်ရေးထိုး နိုင်ခဲ့ပြီး ၂၀၁၀ခုနှစ်ဧပြီလမှာ နယ်ခြားစောင့်တပ်အသွင်ပြောင်းလဲရေးကိစ္စနဲ့ပက်သက်ပြီးတော့ ငြိမ်းချမ်းရေး ပျက်ပြယ်သွားခဲ့ပေမဲ့လဲ ၂၀၁၂ခုနှစ်ဖေဖေါ်ဝါရီလမှာ ၀န်ကြီးဦးအောင်မင်းခေါင်းဆောင်တဲ့ အစိုးရငြိမ်းချမ်းရေးဖေါ် ဆောင်ရေးကော်မီတီအဖွဲ့နဲ့ပြည်ထောင်စုအဆင့်အပစ်အခတ်ရပ်ဆဲရေးသဘောတူညီချက်လက်မှတ်ရေးထိုးနိုင်ခဲ့ပါ တယ်။
မြန်မာနိုင်ငံမှာ လွတ်လပ်ရေးရရှိပြီးကတည်းက တိုင်းရင်းသားတွေနဲ့အစိုးရတို့အကြားမှာ စစ်ရေးပဋိပက္ခတွေဖြစ် ပွါးနေပါတယ်။ သမ္မတဦးသိန်းစိန်အစိုးရသစ်တက်လာပြီးနောက်ပိုင်းမှာ ပြည်ထောင်စုငြိမ်းချမ်းရေးဖေါ်ဆောင်ရေး ကော်မီတီတွေဖွဲ့စည်းခဲ့ပြီးတော့ တိုင်းရင်းသားလက်နက်ကိုင်အဖွဲ့တွေနဲ့ အပစ်အခတ်ရပ်ဆဲရေးဆိုင်ရာငြိမ်းချမ်း ရေးလုပ်ငန်းစဉ်တွေကိုလုပ်ဆောင်နေပါတယ်။
မြန်မာသမ္မတဦးသိန်းစိန်ရဲ့ ဗြိန်တိန်နိုင်ငံခရီးစဉ်မှာ ဗြိတိန်ဝန်ကြီးချုပ် ဒေးဗစ်ကင်မရွန်းနဲ့တွေ့ဆုံစဉ်မှာတော့ တိုင်းရင်းသားလက်နက်ကိုင်အဖွဲ့ ၁၂ ဖွဲ့ကျော်နဲ့ ငြိမ်းချမ်းရေးတည်ဆောက်နေရတာဖြစ်သလို လာမယ့်ရက်ပိုင်းအတွင်းမှာ တတိုင်းပြည်လုံးအတိုင်းအတာနဲ့အပစ်အခတ်ရပ်စဲရေးသဘောတူစာချုပ်ကို လက်မှတ်ရေးထိုးနိုင်ဖို့ ကြိုးပမ်းဆောင်ရွက်နေပြီး တနိုင်ငံလုံးအတိုင်းအတာနဲ့ သေနတ်သံတွေချုပ်ငြိမ်းမယ့်နေ့ဖြစ်လာမှာလို့လည်း သမ္မတ ကနေ ထည့်သွင်း ပြောဆိုသွားပါတယ်။
ဒါပေမဲ့ ဒီလိုငြိမ်းချမ်းရေးလုပ်ငန်းစဉ်တွေကိုအကောင်အထည်ဖေါ်ရာမှာလဲ မြန်မာအစိုးရနဲ့တိုင်းရင်းသား လက်နက် ကိုင်တပ်တို့အကြားမှာ ယုံကြည်မှုအပိုင်းအားနဲနေသေးတဲ့အနေအထားကြောင့် ငြိမ်းချမ်းရေးတည်ဆောက်မှု ကြန့်ကြာနေဆဲလို့လဲ လေ့လာသူတွေကနေသုံးသပ်ပြောဆိုမှုတွေလဲရှိနေပါတယ်။
No comments:
Post a Comment